Parlamentario drs. Mervin Wyatt-Ras ta trece padilanti cu pronto lo bai trata cierto cambionan chikito den e ley di Kinderopvang of ley di Creche. Esaki despues di 5 anja cu e ley aki a ser aproba den parlamento y no a ser implementa dor di gabinete Wever-Croes I y II.
Wyatt-Ras ta relata cu su persona a manda un carta dia dia 3 juni ultimo cu preguntanan pa minister y dia 6 di juni a ricibi e cambionan chikito den ley. Sinembargo ta keda cu despues di 5 anja ainda e ley no a ser implementa.
E preguntanan cu Wyatt-Ras a manda pa minister ta entre otro ki dia e ley di kinderopvang lo ser implementa?
Kico lo falta pa e wordo implementa?
Si minister por otorga Parlamento e plan di implementacion?
Si por manda exigencianan di calidad pa Parlamento?
Si lo tin co-financiamento pa informa Parlamento di esaki.
Tambe a puntra tocante e estudio cu lidernan y directornan di crechenan tin cu sigui pa na por cumpli cu permiso.
Ta na 2017 cu e ley di Kinderopvang a ser trata y aproba na un forma unanime den Parlamento. Aki fraccion di AVP a entrega un mocion pa bin cu co-financiamento entre otro dor di sector priva. E tempo ey gobierno di AVP den persona di minister Michelle Winklaar ya caba a fiha Kwaliteitseisen. Lo a investiga co-financiamento y lo mester a haci nulmeting y hasta lo mester a institui un inspector pa garantisa calidad. Sinembargo no mucho a ser haci despues di 2017.
E minister anterior hasta a kita diferente di e lidernan di Traimerdia y a pasa Kindercentra y Traimerdianan for di e ministerio di Ensenjansa pa e ministerio di Asuntonan Social.
Durante tratamento di presupuesto di anja 2022 Wyatt-Ras hunto cu coleganan a presenta un mocion pa por regla algun rekisito pa garantisa ehecucion di e ley di cuido y guia di nos muchanan tanto den Crechenan como den Trai Merdia. Ta un lastima cu e mocion aki no a ser aproba paso e fraccionnan MEP-RAIZ cu ta sostene gobierno no a mira su importancia.
Un baby a fayece recientemente den un centro di cuido, ta kico mester pasa mas pa gobierno por keda cla cu implementacion. Por cuminsa un caminda y duna sosten na e centronan pa trece cierto cambionan y asina cumpli cu rekisitonan prome cu cuminsa cu control. Ta bai pa nos muchanan cu mayornan por ta trankil cu ora nan hiba nan yiu un creche nan por haya un bon acohida y di calidad.