Shiribana – Diahuebs anochi pa mas o menos 8:45 informacion a drenta di un accidente serio altura di Subway na Shiribana.
Ambulance pasando
Segun nos a compronde un ambulance ariba e ruta ey cu pashent abordo mesora a stop pa mira e seriedad di e accidente, unda cu nan a topa un brommer memey caminda y na banda e motociclista herida.
Prome auxilio
Na nos yegada por a mira algun persona papiando cu e motociclista y wantando su cabes te ora mas ayudo yega.
Despues a yega dos ambulance y esun cu e pashent abordo por a sigui direccion Hospitaal.
E accidente
Na e sitio nos a compronde cu e brommer tawata bayendo direccion Tanki Leendert, momento cu pa un of otro motibo e Van Dodge a bira pa bay e supermarket.
Eynan ta unda e brommer a dal hopi duro contra e parti drechi di e Van kibrando e bentana, tire y lagando basta daño ariba e vehiculo.
Despues e brommer a keda benta no mucho leu di e motociclista cu a bay cay ariba su banda drechi.
Paramediconan mesora a cuminsa stabilisa e hoben, cu a haya sla na cabes y probablemente a fractura un di su pianan den varios parti incluyendo e parti ariba.
Paramediconan despues di algun rato a logra stabilise y lante unda cu a sali direccion Hospitaal cu ne, unda cu mas sigur e lo bay wordo someti na un of mas operacion.
Su situacion ta serio, pero aparentemente no ta critico. Na e sitio e tawata comunica cu e Paramediconan y tawata keha di basta dolor momento cu nan a cuminsa bir’e pa pone ariba e brancard.
Un persona a wordo deteni na e sitio, lo ta trata di un famia di e motociclista cu a agredi chauffeur di e Van.
