Home Entertainment Fundacion Go Cultura ta desee exito! Thaïs Franken orador den conferencia internacional...

Fundacion Go Cultura ta desee exito! Thaïs Franken orador den conferencia internacional na Escocia

SHARE
THAIS FRANKEN



Thaïs Franken, a sali diasabra ultimo rumbo pa e isla Shetland na Escocia, pa representa Aruba y presenta como orador durante e “Island Studies International Conference” cu ta wordo organisa anualmente door di e organisacion “Small Island Cultures Research Initiative”.  E aña aki e organisacion “Centre for Island Creativity” ta e anfitrion.

E organisacion “Small Island Cultures Research Initiative” ta un red internacional di academiconan cu ta facilita comunicacion y colaboracion entre investigadornan y practicantenan Cultural cu ta traha cu comunidadnan di islanan chikito. E meta principal ta pa investiga y asisti cu e mantencion y desaroyo di Cultura riba islanan chikito rond di mundo.

Como orador, Thaïs lo presenta e resultadonan di diferente investigacion haci riba e Industrianan Cultural y Creativo na Aruba, habriendo caminda tambe pa e proyecto importante di “mapping” di e Industrianan aki cu Fundacion Go Cultura a anuncia. Esaki ta pa finalmente colecta data y informacion importante y relevante pa por cuminsa encamina e proceso di formalisa y desaroya e industrianan aki.

Durante e conferencia na Shetland, Thaïs lo intercambia ideanan y lo percura pa network y forma alianza cu investigadornan y practicantenan cultural cu ta biba y traha riba islanan chikito rond di mundo.

Thaïs G. Franken, MSc. ta un profesor den e facultad di Arte y Sciencia na Universidad di Aruba desde 2020. E ta duna les den ambos programa di “Social Work & Development” (SWD) y tambe “Organization, Governance y Management” (OGM). Banda di ta profesor, e ta investigador di e Instituto di Bon Gobernacion y Liderazgo di Aruba. Tambe e ta un candidato doctoral riba e topico di “civil society networks”.

Na aña 2018 el a termina su bachelor’s degree na e facultad di Arte y Sciencia na Universidad di Aruba defendiendo su tesis cu a wordo premia como e tesis di aña: “Placing Culture and Creativity at the heart of the Aruban sustainable development”, investigando e posibel impacto economico, cultural y social di un Industria Creativo.
Desde e aña ey el a bira un portavoz importante pa e formalisacion y desaroyo di e Industrianan Cultural y Creativo di Aruba. Conscientisando continuamente di e potencial y e balor di e industrianan aki.

 

Despues di a gradua pa su bachelor’s degree, el a sali rumbo pa Hulanda na 2018 pa por obtene su Master’s degree. Na Augustus 2019 el a defende su master thesis titula: “The Road Towards an Innovative Aruba: A Q-Analysis on the Synergy Between the Creative Industry and Knowledge Economy as a Driver to Stimulate Socio-Economic Development in Aruba’s Local Innovation System”.
Cu esaki el a obtene un double Masters of Science degree den “Public Policy and Human Development” na Universidad di Maastricht y e “United Nations University Maastricht Economic and Social Research Institute on Innovation and Technology” cu un specialisacion den Innovacion, Institucion, y Desaroyo.

E tesis aki a hala hopi atencion y interes for di varios academico Hulandes y internacional. 

 

Thaïs ta un miembro activo di Fundacion Go Cultura. Desde juli 2020 e ta un di e presentadornan di e programa “Ban Papia Cultura” produci door di e fundacion aki, pa conscientisa nos comunidad di e balor y potencial di e Industrianan Cultural y Creativo.

Tambe a traves di e fundacion e ta facilita cursonan importante pa empodera y expande capacidad y conocemento di nos creativonan local.

Fundacion Go Cultura ta desea nos colega Thaïs Franken hopi exito durante e conferencia aki. Nos ta convenci cu e lo desplega un trabao magnifico no solamente representando Aruba, pero tambe pa forma alianza y sosten pa asisti nos islanan cu formalisacion y desaroyo di nos Industrianan Cultural y Creativo.
Esaki ta un oportunidad unico pa hiba Aruba su nomber y relevancia riba plataformanan academico di nivel pa asina logra construi brugnan pa colaboracion importande den futuro cercano.