Oranjestad: Diahuebs merdia Minister Endy Croes tabata den Parlamento di Aruba pa un reunion yama pa Presidente di Comision Fiho di Enseñansa, Parlamentario Shailiny Tromp – Lee. Presente na e reunion tabata directora di Departamento di Enseñansa sra. Anne Marie Groot y director di EPI sr. Ryan Maduro.
E mandatario a expresa cu e tabata un encuentro ameno unda a duna hopi informacion. E tema di e reunion tabata e rumornan cu tin rond di EPI y e diesdos ‘opleiding’ cu a wordo renoba y ta cuminsa na luna di augustus binidero tanto nivel 1 y 2 di EPB y nivel 3 y 4 di EPI. Minister Endy Croes a sigui bisa cu a duna splicacion amplio na unda tur Fraccion tabata presente. A contesta un serie di preguntanan y of inkietud cu nan tabatin. E mandatario a expresa di ta hopi contento cu na final di e reunion tur Fraccion a sali contento cu hopi informacion a compronde e trayecto a compronde e proceso y den mi concepto e Parlamentarionan lo sostene e innovacion y modernisacion den enseñansa.
Pa finalisa Minister Endy Croes a enfatisa cu e lo atende tur reunion di Comision Fiho, manera nan wordo yama, e tey pa duna informacion y splicacion na tur Parlamentario.