Manera semper mi a bisa pa hopi aña y ta manera mi a wordo lanta na cas di mi abuelonan, y na cas di mi mayornan ; ‘Simplesa ta nos Grandesa’ . Un bida simpel ta siñabo hopi cos. E ta siñabo balora bo sernan keri na momento cu ainda nan ta na bida; e ta siñabo habri bo cas pa un desconoci, pa un persona di menos recurso; cushina pa mas persona pasobra bo no sa na ki momento un bishita inespera ta yega pa bo dune di come; e ta siñabo cu nos grandinan a pasa nos nan conocemento di bida pa nos bai dilanti; e ta siña bo protehe bo mes y protehe otro. Un bida simpel ta yena cu bendicion cu porta bo no ta mira, pero si bo ta sinti, of bo sa, of a experiencia e mundo di Milager. Cada Milager ta personal; Bida mes ta un Milager, ta agradecido.
Den edicionan prome por a lesa mas riba con politica ta e arte di combersa, cu nos dialogo, esta nos combersacion, ta uno pa diferente persona den nos comunidad por compronde. Nos dialogo ta pa siña di otro pa asina ambos por compronde, y por verifica si e otro a compronde loke a wordo bisa. Hasta politiconan, esnan tambe aspira pa sigi e caminda aki ta honra pa sigi pasonan di esnan cu nan ta mira, skucha y ta preparanan mes pa tuma e reto pa hunto guia un pais. Guia un pais ta rekeri di tin e balance individual y por traha colectivamente, esta den grupo. Collectivamente nos ta uni y trece nos profesionalismo, conoce e habilidad di e otro persona, respeta, balora loke cada un ta trece cu ne como guia. Tur persona merece un chens pa traha pa nan pais te dia nan escogencia ta pa crece den nan carera y sigi nan rumbo desea.
Mi a skucha hopi persona bisa e politiconan biew tin cu retira, pa varios motibo. Como politico hoben mi ta compronde bo oponencia, y ta desea di expresa tambe cu mester tin mas respet pa tur e sacrificionan cu politiconan ta haci pa nan pais. Respet, honor, diciplina bo ta gana door di diferente aspecto den bida, e aprecio pa trabou cu a ehecuta durante añanan pa otro, con bon bo departamento generalmente a skucha, a mira, a yuda bo pueblo. Ora bo huramenta pa por traha pa bo pais bo ta trahando pa bo mes tambe, pa bo famia, pa bo yuinan; sin lubida kerido lector esnan di bo tambe y di bo bisiña; Esaki ta parti di e ‘Bon Comun’ di un comunidad. Maske nan ta mesun persona cu nos, nan tin e trayectoria amplio pa guia un pais, porta bo ta of no ta interesa den politica, pero tur dia den bida bo ta combersa y yega na un discusion cu amistad, y noticia pa bo; “esaki tambe ta politica na otro nivel”. Na momento cu un politico tuma decisionan pa su pais, ta pasobra e ta mira futuro di un pais, usando strategianan di e ‘bon comun’. Bo gusta of laga, nos mester di nos politiconan experiencia y siña traha hunto, porta e jongnan ta skucha esun di experiencia, y viceversa pa yega na un mihor mayan.
Cada habitante tambe ta esun cu lo dicidi su futuro, un comunidad ta percura pa hunto crece. Nos tur a pasa duro, mi ta compronde e ora con dificil ta tambe pa un pais ricibi e fiansa necesario pa por biba si nos mes no tin esaki. E carencia di placa a siña nos hopi, cu no ta tur cos ta placa ora bo no tine. A siña riconan pa yuda humanidad enves di enrikece na momento cu nos tin cu repara e daño cu a wordo haci na nos mesun mundo y busca otro opcionan y siña nos hendenan con pa biba mas consciente sin drenta den panico y prepara pa loke cambionan ta trece cu ne. Prome cu sinta ofende un politico, kibre den su carrera, mira den bo cura, den bo bario, e tempo cu bo ta yega di San Nicolaas pa Playa, of di Santa Cruz pa San Nicolaas, Aruba su economia circular. Nos kier critica, mi tambe ta critico riba varios cos, mi tambe a aporta na mi isla hopi aña, mi tin derecho di divulga lo necesario y abo tambe.
Abigaél Arends – Personal Coach, Corporate Development & Communications Specialist