“Emocion den Palabra” ta poesianan cu ta trata realidadnan di bida
ORANJESTAD – Diamars anochi, Prome Minister Evelyn Wever – Croes hunto cu colega Minister Endy Croes, tabata presente na presentacion di e buki “Emocion den Palabra” di sra. Letitia Wever. E buki di poesia aki a wordo bendiciona na un forma unico cu santo blanco door di ruman di sra. Letitia, sra. Odette Dabian – Wever. Sra. Odette hunto cu su casa Miro Dabian, den feliz memoria, tabata e motornan tras di e publicacion di e poesianan.
Prome Minister Wever – Croes a duna pabien na sra. Letitia y a expresa di a keda inspira cu e forma bunita con sra. Letitia a splica cu su emocionnan a wordo poni riba papel, esaki ta algo cu a capta tur atencion.
“Ta asina bunita cu ora cu nos no tey mas riba mundo aki mas, cu otronan por sa kico tabata nos emocionnan na cierto momento di nos bida y cu esakinan talves por yuda nan. Na e ocasion diferente poesia a wordo presenta. Tabatin poesianan cu a entretene un y tur presente y cu a pone esnan presente hari, y tabatin algun poesia mas serio. Pero tur e poesianan tabata trata di realidadnan di bida. Y e bunita forma cu Letitia ta describi esaki mi ta admira enormemente, Premier Wever – Croes a expresa.
Por ultimo, Prome Minister a gradici sra. Odette y henter famia cu a sostene sra. Letitita den esaki. “Pabien y danki pa comparti tur esaki cu nos.”
