Home Local Celebracion Dia Internacional di Famia Organisa door di Centro pa Hoben y...

Celebracion Dia Internacional di Famia Organisa door di Centro pa Hoben y Famia conhuntamente cu Centro di Bario Playa Pabou

SHARE

ORANJESTAD – Centro pa Hoben y Famia un Centro caminda shete (7) Instancia ta traha ariba tereno preventivo a uni pa ofrece comunidad informacion, guia y sosten na famianan ariba tereno di lantamento di mucha. E Centro su meta principal ta pa re-enforsa famianan y conscientisa nos comunidad ariba e responsabilidad cu nos tur tin pa crea famianan saludabel.

Dia Internacional di Famia
Anualmente riba 15 di mei desde aña 1994 stipula pa Nacionnan Uni, mundo ta celebra Dia Internacional di Famia. E meta di e dia aki ta pa conscientisa e comunidad e importancia di e sistema familiar pa cada ser humano y di pasa tempo hunto.

Un mucha desde su prome dia cu e nace tin e necesidad di amor y afeccion pa e por biba, crece y desaroya saludabel. E tin necesidad pa ricibi apoyo, guia y e tempo pa pasa hunto cu su famia.
Den su famia e ta ricibi norma y balornan, e ta siña forma lasonan social, e ta comparti, e ta anda cu su miedo nan, su logronan, e ta ricibi motivacion, etc.
Tin bes nos ta pensa cu un yiu tin cu bay scol pa siña tur cos, pero e scol mas grandi di bida pa cualkier ser humano ta su hogar, unda cu e ta ricibi locual cu ta bay yud’e desaroya den un ser humano saludabel.

Famia ta e fundeshi of e pilar di un sociedad
No ta pornada cu ta yama e famia, e fundeshi of e pilar di un sociedad. Un sociedad cu famianan fuerte, saludabel y resiliente ta haci un comunidad fuerte y prospero. E pandemia cu a pasa mundialmente a haci un impacto grandi ariba e sistema familiar. Tur e medidanan, e stress laboral, stress emocional y stress psicologico tawatin su impacto y poco poco nos lo experiencia e efectonan.

Tambe nos por scucha di e lesnan importante cu periodo aki a duna nos;
– Con valioso e ta pa tin un circulo familiar.
– Con e famianan a sostene otro den temporada di malesa.
– Den temponan duro a sa di consola otro.
– Sostene otro financieramente.

Tin famia cu awe ta mas uni cu nunca, ta mas consciente y kier dedica mas tempo cu otro.

Tips di actividadnan den famia
Centro pa Hoben y Famia kier haci un apelacion pa comunidad (gobierno, doñonan di trabou, coleganan, familiarnan, amigonan) keda demostra e empatia y comprension pa otro.

Dia Internacional di Famia ta un bon oportunidad pa pasa tempo cu famia. Haci actividadnan simpel den famia y pasa tempo hunto ta sirbi pa haci lasonan familiar mas fuerte y sano.

Akinan algun tips pa famia:
1. Planea den bo schedule di e siman of e dia aki pa haci algun actividad leuk cu bo famia, e por ta cosnan simpel manera;
– Bay hike,
– Bay bishita un parke,
– Bay misa hunto,
– Bay pasa dia na lama,
– Sali bay come algo hunto.

2. Algun actividad cu mayornan por haci paden cu famia:
– Pinta, kleur of verf cu bo yiunan chikito
– Traha snacks, bolo of algo di come hunto cu famia
– Traha den cura cu matanan of planta
– Core rond cu bais
– Planea un campamento den cura di cas mes cu henter famia
– Hunga weganan di mesa (manera ‘mens erger je niet’, wega di carta, etc) cu ta trece momentonan di hopi alegria
– Decora e cas, of bay wak un album familiar hunto of mira bek potretnan familiar.

Celebracion
E aña aki pa prome biaha Centro pa Hoben y Famia hunto cu 15 Instancia y den cooperacion cu Centro di Bario Playa Pabou a scoge pa celebra Dia Internacional di Famia y kier invita e comunidad di Aruba pa bin celebra e dia aki cu nos.

Diadomingo awo 15 di mei na Centro di Bario Playa Pabou for di 10’or di mainta te cu 3’or di atardi lo tin presencia di 15 Instancia pa brinda tur informacion di nan servicio y alabes lo tin diferente actividad pa full famia. Adhunto riba e flyer por mira e programa.

Ademas di e celebracion diadomingo awo lo tin 3 charla pa mucha y adulto:
1. ‘Kids Empowerment’, pa mucha (edad 10 – 13 aña), diahuebs 19 di mei 2022, for 3:00 pm te cu 5:00 pm na Centro di Bario Playa Pabou.

2. ‘Responsabilidad di Mayor’, pa adulto, diamars 24 di mei 2022, for 7:00 pm te cu 9:00 pm, na Centro di Bario Playa Pabou

3. ‘Famianan Saludabel’, pa adulto, diamars 31 di mei 2022, for di 7:00 pm te cu 9:00 pm na Centro di Bario Playa Pabou.

Final
Centro pa Hoben y Famia kier gradici CEDE Aruba pa e tremendo sosten financiero pa haci e e celebracion aki posibel. Nos ta warda tur famia diadomingo awo 15 di mei na Centro Di Bario Playa Pabou!