Durante e prome bishita di Allure of the Seas na Aruba, Ronella Croes CEO di A.T.A., conhuntamente cu Minister di Turismo, Dangui Oduber a haci entrega di un cuadra di un cas tipico di Aruba, na e capitan di e crucero. Esaki a tuma luga durante e ceremonia di plakaat cu ta parti di tur yegada inagural di crucero.
Algun miembro di e ekipo di A.T.A. a forma parti di e grupo cu a subi e crucero pa atende e ceremonia aki y despues ricibi un recorrido di e crucero. Como oficina di turismo e ta un orguyo di por wak e yegada inaugural aki y sigur di por tawata parti di dje.
A.T.A. kier gradici y duna pabien pa e logro aki na comunidad di Aruba como tambe Ministerio di Turismo, Aruba Ports Authority, SEL Maduro & Sons como agente di Royal Caribbean Cruise Lines y sigur tambe na e ekipo completo di e departamento di turismo crucero di A.T.A.
For di 2011 oficina di turismo a tuma over responsabilidadnan cu ta regarda turismo crucero tambe, cual tabata resorta bou di Aruba Cruise Authority anteriormente. Hunto su socionan clave incluyendo Ministerio di Turismo y APA, A.T.A. ta inverti den varios aspecto clave pa cu desaroyo di turismo crucero. Parti di e ekipo ta encarga cu e servicio na cliente ora e turista ta na Aruba. Banda di esaki ta traha riba atraccion y mantencion di socionan crucero. Tambe ta traha cu diferente autoridad pa asina optimalisa e experiencia di e bishitante unabes cu e ta riba nos isla.
Durante e periodo di 2011 pa 2019, turismo crucero a mustra un averahe di crecemento anual di 5%.
-FIN-