Home Politics Parlamentario Marco Berlis (MEP): Seminario pa fortalece parehanan y matrimonionan aki na...

Parlamentario Marco Berlis (MEP): Seminario pa fortalece parehanan y matrimonionan aki na Aruba

SHARE

 

Fraccion di MEP ta keda pone nos hendenan central

 

For di algun luna pasa mi a cuminsa un iniciativa hunto cu algun miembronan di Parlamento di nos fraccion, pa bini cu un instrumento cu lo por inspira, restaura y aporta na pareha y famianan aki na Aruba.  Nos mayornan, tata y mamanan ta bao di atake. E presion den diferente areanan riba nos hogarnan ta grandi y mi no ta papiando aki solamente di retonan financiero, pero tambe riba e tereno di abuso verbal, fisico, emocional, manipulacion y salud mental entre otro. Falta di recurso y coaching inmediato ta hunga un rol den e stabilidad di parehanan y matrimonionan cu ta forma nos hogarnan y comunidad di Aruba. 

 

Data y cifranan aki na Aruba ta mustra cu tin basta divorcio, mamanan soltero, y muchanan afecta dor di e realdidad tristo aki. E muchanan cu ta experencia separacion di nan mayornan, rechaso di un of mas mayor, ta pasa dor di hopi dolor y dificultad emocional. Esaki sigur ta hunga un rol con e mucha ta desaroya na scol y personalmente. E ta un realidad cu ora cu muchanan no tin stabilidad y un modelo adecua pa sigui, e tendencia por bira cu nan ta cuminsa bay den caminda ekiboca. Ademas, parehanan y matrimonionan den e tempo aki mester hopi mas ayudo cu tin disponibel den comunidad actualmente. Di berdad e necesidad ta grandi pa conseheronan di experiencia, cu tin un bida ehemplar den e area aki.  

 

Pa e motibo aki, como parlamentarionan representando pueblo, y cu amor pa nos comunidad, nos a dicidi di organisa un seminario specialmente pa yuda parehanan tin un relacion exitoso cu otro. E no lo ta djis otro seminario mas, pero un experiencia unico y hopi special. Nos lo percura pa e ta experiencia hopi interactivo tambe y den un ambiente personalisa cu lo yuda parehanan transiciona for di nan luchanan pa un relacion cu mas comprension, amor, mihor comunicacion y mucho mas. Nos ta planificando e experiencia unico aki pa luna di Juni tentativamente y ta desea pa hiba esaki na tur districto. Mi ta invita bo pa keda pendiente pa mas informacion y asina esnan interesa lo por registra pa e anochinan aki.

 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper, sin nada di sconde!