ORANJESTAD – Recientemente Minister di Husticia y Asuntonan Social Sr. Rocco Tjon a reuni cu directiva di CEDE Aruba den cuadro di proyecto di Veilige Barios. Manera ta conoci, e proyecto aki a wordo aproba den presupuesto 2022 pa parlamento di Aruba, cu e meta pa ofrece mas na nos hobennan den e barionan.
Ministerio di Husticia y Asuntonan Social ta considera e inversion den barionan uno hopi importante, mirando cu ta inverti den e parti di prevencion. Recientemente a haci un estudio enfoka riba e calidad di bida di nos hobennan, y esaki a efantisa e importancia di percura cu den barionan tin actividadnan pa nos hobennan. Pa e motibo aki, ta importante pa inverti den nos barionan na un manera sostenibel. A traves di e inversionnan aki ta haci nos barionan menos atractivo pa tur tipo di criminalidad. Esaki ta un oportunidad unico pa transforma dicho barionan, den barionan cu ta ofrece oportunidadnan na hobennan pero tambe na henter comunidad.
CEDE Aruba hunto cu Ministerio di Husticia y Asuntonan Social lo ehecuta e proyecto aki, den cual e meta lo ta pa transforma nos centro di barionan a largo plaso. Ademas di Ministerio di Husticia y Asuntonan Social e proyecto aki ta conta cu sosten di tres ministerio mas, esta; Ministerio di Deporte y Enseñansa, Ministerio di Labor, Integracion y Energia, Ministerio di Integridad, Naturalesa, Transporte y Cuido di Grandinan.
Den cuadro di e proyecto lo duna e debido atencion na e mantencion di e centro deportivonan y e parkenan pa nos hobennan, lo percura pa barionan ta miho ilumina, lo percura pa e situacion di trafico ta uno mas sigur pa nos muchanan y lo bin cu mas afterschool programs entre otro.
Por ultimo, e mandatario a señala cu dentro di poco lo firma un MOU cu e diferente ministerionan y demas partners cu ta hunga un rol clave, pa asina garantisa cu e proyecto aki por sigui un trayecto a largo plaso. A logra delinea e liña di tempo pa cu e proyecto aki, y fin di luna lo duna un presentacion na tur e centronan di bario, pa por inicia ehecucion di a “afterschool” programs.
