En conexion cu nos dia Nacional 18 di maart, Parlamentario Molina a bishita diahuebs mainta St. Paulus School na San Nicolas unda e alumunonan y docentenan a organisa un tremendo evento cultural. Presente tambe n’e mainta special aki tabata nos Prome Minister, sra. Evelyn Wever – Croes y Minister di Enseñansa y Deporte, sr. Endy Croes. Na yegada nan a wordo ricibi pa cabesante di scol, sr. Randy Arends mientras e alumnonan tabata wardando e bishita cu hopi alegria y sumamente entusiasma. E ceremonia a inicia cu hisamento di e bandera di Aruba y canto di Himno, Aruba, Dushi Tera.
Alvin Molina a sigui bisa; mi tabatin e honor pa hiba algun palabra ne muchanan unda mi a enfatisa riba e color cora di nos bandera cu banda di ta significa e sanger cora di e indjannan cu a bringa pa nos Libertad den Rooi Frances. E ta e color di stimacion, e stimacion cu nos tin pa nos isla. Pero con bo ta expresa e stimacion? Door di stima nos mayornan, docentenan, door di stima otro, nos ta stima nos pais. Nos mester expresa e stimacion ne manera con nos ta trata otro.
Despues a bishita e klasnan pa wak e exposicion di e diferente temanan cu nan a prepara; Aruba di antes te cu awo. Cada klas durante seis siman a haya les di e historia di Aruba, cada klas riba nan nivel. Y diahuebs ultimo a culmina cu un bunita exposicion di tur loke nan a siña y e materialnan cu nan a traha. Tambe por a saboria e dushi cuminda crioyo y pasaboca cu e alumnonan a presenta.
Finalisando Alvin Molina a keda hopi impresiona di wak loke e muchanan a presenta. Mi ta felicita e alumnonan y docentenan di St. Paulus School cu e bunita exposicion y evento cultural. Alabes gradici e mayornan cu ta sostene nan yiunan, yuda nan cu les y engrandece cultura di Aruba.