Un bes mas fraccion di AVP pa medio di parlamentasrio Arthur Dowers, kier a mustra comunidad riba e hecho cu pueblo ta pasando den momentonan difícil, pueblo ta birando den un temporada complica, cu nubianan scur riba e país aki pero na mes momento pueblo tin un gobierno incoherente y totalmente desconecta cu e realidad di comunidad.
“Na prome luga mi kier bay riba e maneho di labor, e maneho di admision, pa motibo cu nos a haya informacion diaramente for di personanan local cu prome cu pandemia tabatin trabou y a wordo kita for di trabou, por ehempel esunnan trahando na aeropuerto y diferente otro luga cu hendenan a perde nan trabou.
Hendenan cu na e momentonan aki ta buscando tur caminda den comunidad pa nan yega na un trabou y nan no ta logra den e proposito aki pero si nos a constata cu e Minister di Labor y Integracion, dos siman pasa a gaña parlamento.
Mi ta bisa gaña pasobra ora cu Glenbert Croes a sinta como minister no oficial aki pa motibo cu no a cambia e LIM, el a informa parlamento cu el a traha un otro maneho nobo apesar cu e no tabata minister oficial ainda, cual maneho tabata totalmente diferente cu e maneho cu tabata wordo hiba pa Andin Bikker.
Ora cu a puntra minister Croes si el a cambia su maneho te cu e cuminsa implenta e maneho aki, si e por duna Parlamento e maneho cu e ta hibando e ora y riba esaki nos a dirigi varios pregunta na Presidente di Parlamento pa su persona manda esakinan pa Minister Glenbert Croes.
Entre otro nos a pidi pa su persona como minister informa Parlamento di su maneho nobo pero na mes momento duna nos e maneho aki of na unda e ta publica esaki pa asina nos por tuma nota di esaki pero te dia di awe, pues dies dia despues, mi no a ricibi e maneho aki cu tambe ta dos luna despues cu el a bisa cu el a traha e maneho.
Mi ta lamenta cu Minister ta bisa cu el a traha un maneho, cu e ta bay haci mas facil pa trece hende, pa hacie mas facil pa hendenan bin y pa nan keda Aruba, caminda mesora fraccion di AVP a mustra e minister cu nos kier mira un investigacion, pasobra si tin asina tanto hende cu na e momentonan aki ta bandonando Aruba y asina tanto hende ta buscando un trabou na e momentonan aki y no ta logrando, nos tin gana e ora di mira e investigacion cu e Minister a haci.
Na mes momento nos kier sa si e minister aki ta personalmente responsabel pa esaki, a cu peculiarmente e ta minister tambe di labor pero en realidad e minister aki no ta interesa pa haci ningun investigacion, pa duna indicacion di e estado di pueblo pa di e forma aki mira si por yuda comunidad pa haya trabou, esunnan cu a perde trabou, esunnan cu ta buscando trabou of esunnan cu a caba scol tambe por drenta mercado laboral.
Pero loke nos ta mirando di e maneho di e minister aki ta pa e cumpli cu algun amigo cu el a priminti cosnan den campaña y pesey nos por mira mescos cu tur otro hende, cu e minister ta hibando un maneho descabeya pa faborece cierto hendenan.
Loke si ta di lamenta profundamente ta cu e minister aki ta mesun minister cu nos a mira algun siman atras a wordo denuncia cu tin un ilegal trahando cerca di un luga di su famia, caminda ela manda hopi hende na e cas caminda e ilegal aki tabata trahando y despues a bin Sali na cla henter un drama cu a tuma luga cu e ilegal aki.
Aki tin cu mustra cu e tipo di decisionnan aki cu e minister di labor a haci den e direccion ey, ta cay pa responsabilidad di e minister di husticia kende ta esun legalmente responsabel.
Nos ta spera di ricibi contesta di Minister Glenbert Croes riba nos preguntanan y duna nos tambe un copia di e maneho cu e dia y fecha cu el a publica e maneho aki pa nos pa asina nos confirma cu realmente e tin un maneho loke nos ta duda, ya cu si e tabatin un maneho lo el a mande caba pa Parlamento,” Parlamentario Arthur Dowers a declara.