Home Dutch Kingdom Robo di droga, a conduci na corupcion den Kuerpo Polisial Korsou, sospecho...

Robo di droga, a conduci na corupcion den Kuerpo Polisial Korsou, sospecho fuerte riba e elitenan, Team di Aresto

SHARE

Durante cu tabata haciendo investigacion tocante e robo di Cocaina, un ex oficial di polis a wordo deteni. E ex agente aki deteni ta djis e comienso, ainda tin mas puyito pa sali for di e macuto.

Willemstad,Corsou:
Amsterdam, Hulanda:
Un ex agente policial a keda deteni fin di januari ultimo na Hulanda. E la keda deteni como sospechoso di e robo di droga for di un warda di polis na Corsou na 2018. E agente y dos otro sospechoso mas a keda deteni na Hulanda.

Dos di na ta wordo acusa di tabata envolvi den e robo di un cargamento di cocaina cu a wordo confisca cu tabata tin un balor riba caya di 15 miyon Euro. Autoridad na Corsou, a pidi Hulanda pa entreganan e sospechosonan aki. Actualmente e procedura ta canando su caminda.

Segun fuentenan fededigno, durante e investigacion nan lo a haya indicacion fuerte cu e corupcion den e Cuerpo policial na Corsou ta hopi mas profundo. Dos testigo anonimo a declara dilanti e onderzoeksrechter cu un cantidad di alto funcionario policial ta envolvi den crimennan relaciona cu droga y cu nan tambe posibelmente por ta envolvi den e robo di droga grandi aki. E funcionarionan corupto ta inclui tambe algun cu ta traha den e team di aresto na Corsou, te caminda ta conoci te na e momentonan aki oficialmente niun a wordo acusa di corupcion ainda.

E ex agente policial cu a awo a wordo deteni, ta un homber di 33 aña , cu na 2019 caba a wordo deteni, pero e tempo ey no a wordo persigui pa husticia. E investigacion a bolbe wordo habri na 2020, despues cu autoridad a haya diferente tipsnan y testigonan anonimo Esaki a conduci na 2021 na detencion di 6 sospechoso na Corsou, di e 6 nan tres a wordo laga den libertad y tres ainda ta deteni.

E robo a tuma lugar riba e anochi di 13 pa 14 di oktober 2018, na un warda di polis na Willemstad y e robo di droga aki a haya e nomber di ‘E robo grandi di droga’. Den e kluis tabata tin 530 kilo di cocaina, casi dos mil pildo di xtc, 15 kilo di marihuana y 30 mata di marihuana, esaki tabata locual a wordo poni den e proces-veraal despues di e robo. E cantidad di droga aki a wordo confisca pa autoridad, entre fin di augustus cu fin di september 2018.

E tempo ey tabata tin un indicacion fuerte riba un agente policial cu lo mester a busca e droga y entregu’e back na un traficante Antiyano cu a fayece algun tempo atras. E agente policial lo tabata tin un palabracion cu e narco traficante, cu lo mester a laga mas di 200 kilo di cocaina pasa p’e, pero algo a bay robes y Kustwacht a confisca e cargamento di cocaina aki. E agente policial a wordo poni responsabel pa cu esaki y a wordo poni bou pression pa bay saca e droga y trece bek pa e narco traficante.

Den e kluis special caminda polis na Corsou ta warda droga cu keda confisca, net e tempo ey tabata tin un kiebro den e kluis aki y tabata tin hopi mas droga cu e 200 kilo di cocaina aki. Un aña despues di e kiebro e agente policial aki a bay biba na Hulanda. Den e investigacion pa haya sa kiko tabata su rol den e traficacion di droga aki, a haci uso di e resultadonan di e investigacionnan haci pa polis na Hulanda.

Segun bon fuente algun testigo anonimo a hunga un rol importante den e reapertura di e investigacion di e caso aki. E testigonan anonimo a declara cu e agente policial tabata hopi preta y door di debe e la wordo blackmail pa e narco traficantenan maffioso na Corsou.

Tambe a sali na cla, for di e declaracionnan di testigonan cu e narco traficantenan ta haya nan informacion for di nan contactonan corrupto, cu ta pasa nan informacion entre otro di e forma di traha di “Kustwacht”. Kustwacht Caribisch Gebied ta cay bou di responsabilidad di Ministerio di defensa di Reino Hulandes. Kustwacht tin basta aña envolvi den combatimento di traficacion di droga pa y for di e islanan Hulandes den Caribe y ta traha den cooperacion cu Marina Mericano.

Na 2019 riba un barco di Marina Real cu a regresa Hulanda despues di tabata riba un mission den Caribe, abordo di e barco a bin topa cu 12 kilo di cocaina, e militar sospechoso a wordo deteni. Na 2019 y na 2021 a detene dos grupo di militar riba sospecho di posesion y uso di cocaina.

FUENTE: NRC.nl