Home Local Den 2021 a recupera 69% di pasaheronan cu a  biaha for...

Den 2021 a recupera 69% di pasaheronan cu a  biaha for di Aruba na 2019  Recuperacion di 86% na December 2021 compara cu 2019

SHARE

ORANJESTAD – Aruba Airport Authority N.V. (AAA) ta raporta riba Aeropuerto Internacional Reina Beatrix (AUA Airport) su prestacion pa December 2021; un otro luna cu un rate di recuperacion satisfactorio compara cu e mesun periodo na 2019. E cantidad total di revenue generating passengers (pasaheronan cu ta biaha for di Aruba) cu a wordo atendi den 2021 a representa un recuperación di 69% compara cu 2019.

 

December 2021

Den December 2021, AUA Airport a atende 91,086 pasahero cu a biaha for di Aruba. Esaki a resulta den 7% mas pasahero compara cu e luna prome. Durante e luna aki AUA Airport a recupera  86% di e cantidad di pasaheronan cu a wordo procesa na 2019 durante e mesun luna. Na December 2021 67,011 pasahero (pax) a biaha pa Merca, 3,764 pax pa Canada, 6,963 pax pa Europa, 3,592 pax pa Antiyas Hulandes, y 9,756 pax pa Latino America. 

 

Un averahe di Passenger Load Factor (PLF) na salida (cantidad di asiento ocupa di e cantidad total di asiento disponibel abordo di un avion ora di sali for di Aruba) pa e mercado Mericano di 66% a wordo raporta durante December 2021, mientras cu e PLF averahe pa tur mercado hunto tabata 67% durante e mesun periodo (en comparashon cu 2019 unda e PLF pa tur mercado hunto tabata 85%). 

 

Durante e luna aki, AUA Airport a atende un averahe di 34 buelo pa dia, menos compara cu e 37 buelonan pa dia cu a wordo atendi den e mesun temporada na 2019. Den e mesun periodo den 2020 AUA Airport a atende solamente 659 buelo mientras cu Aruba a habri su frontera bek na Juli 2020 pa tur operacion comercial. 

 

Aña 2021 completo

Na 2020 AAA a premira pa 2021 un recuperacion di aproximadamente 50% compara cu 2019. Pero e ultimo aña a demostra un recuperacion mihor di loke a spera y a yega na un total di 69% di recuperacion pa 2021 compara cu 2019. Compara cu 2020 AUA Airport su cantidad di revenue generating passenger a aumenta cu 104%. 

 

Na 2021 AUA Airport a procesa un total di 712,321 revenue generating passengers cu a biaha pa Merca, 8,275 pa Canada, 65,396 pa Europa, 29,376 pa Antiyas Hulandes, 60,919 pa Latino America y 293 pa otro mercado. E mercadonan cu mas a aumenta den 2021 compara cu e aña anterior tabata Merca cu 117% y Europa cu 103%. E mercado Latino Americano tambe a crese fuerte cu 97% mientras e mercado di Antiyas Hulandes a crese cu 44%.