Home Local Helicopter di Kustwacht a trece un persona cu a bira hopi malo...

Helicopter di Kustwacht a trece un persona cu a bira hopi malo abordo di barco

SHARE

Oranjestad:
Diamars den careda di 7’or di anochi, un barco mara dos miya pabou di Aruba, ta pidi ayudo na momento cu un miembro di nan tripulante a bira hopi malo. Mesora a cuminsa cu e preparacion y coordinacion pa transport’e pa tera, caminda e lo mester ricibi tratamento medico mas avansa. Aparentemente e persona lo a haya un bloeding.

Coordinacion tabata bou encargo di Bureau Rampen Bestrijding, cu mesora a tuma contacto cu Kustwacht na Corsou y asina e helicopter di Kustwacht equipa cu un dokter abordo a sali pa bay busca e persona cu a bira malo abordo di e barco.

Den careda di 12’or mey anochi, por a mira Douane, personal di Airport Authority y di General Aviation Terminal yega na e terminal aki, pa asina cuminsa prepara pa e yegada di e helicopter. Ambulance a wordo pidi pa transporta e persona pa hospital. Tur cos a wordo bon prepara y coordina. Den careda di 1’or di marduga e helicopter di Kustwacht a aterisa riba e pista di General Aviation Terminal, hopi lihe su tras ambulance a yega y a busca e persona malo y transport’e pa hospital.

Tambe por a mira directeur di Bureau Rampen Bestrijding presente, durante cu e helicopter a aterisa. Despues cu e persona malo a wordo entrega den man di e paramediconan di ambulance, e helicopter di Kustwacht a lanta buelo cu destino nan base na Corsou.