Un pareha cu dos yiu chikito a mur gevries net over di e frontera di Canada. E famia tabata enbusca di e American Dream .
E famia Patel a yega recientemente Canada, nan a bin for di nan pais natal, India. Aparentemente e famia lo a cana 11 ora largo prome cu nan a fayece di e temperaturanan hopi bou zero (-35C) cu nan a expone nan mes na dje. E famia a fayece hopi cerca di e frontera di Canada cu Merca. E anochi cu e famia a muri, e temperatura a baha te bou di -35 grado Celsius.
E curpanan di Jagish Patel (39), Vaishailben Patel (37) y nan yiunan Vihangi (11) y Dharkmik (3) a wordo haya riba un veld na Manitoba, Canada, dia 19 di januari 2022.
E curpanan a wordo identifica pa representantenan di India na Canada y despues a keda confirma pa e polisnan di Canada.
Autoridad Canades, ta sospecha cu e morto di familia aki lo ta relaciona cu traficacion di hende.
E famia tabata procedente di Dingucha, un pueblo na Gujarat, den e distrito di Gandhinagar na India. BBC lo a papia cu e bisiñanan di famia Patel y nan a conta cu como 10 dia pasa e famia a biaha pa Canada, pero cu un visa di turista.
Segun un di habitantenan di e pueblo, algun miembro di famia a trata di comunica cu autoridad di India, despues cu 5 dia a pasa y nan no a tende mas di e famia Patel.
E bisiñan a pensa haciendo esaki, nan lo yuda e famia. E famia di e pareha tabata teme cu algo lo por a pasa nan of cu nan lo por tabata den problema y a dicidi di manda avisa Ministerio di Asuntonan Exterior.
E inspecteur di polis, Rob Hill di RCMP, den un conferencia di prensa a bisa cu famia Patel a yega Toronto,Canada, dia 12 di januari ultimo. Desde Toronto nan a bay na e parti west te na e provincia di Manitoba, prome cu nan a biaha pa Emerson, un cuidad cu ta keda na e frontera di Canada cu Merca, esaki tabata 18 di januari ultimo y e curpanan a wordo haya e anochi siguiente.
Den e area unda e curpa nan a wordo haya no tabata tin niun vehiculo of rastronan di un vehiculo cu a keda atras. Autoridad ta sospecha cu un persona lo a hiba e famia na e punto aki y lo a consehanan pa nan cuminsa nan biahe di crusa e frontera na pia.
Famia Patel tabata forma parti di un grupo di 7 persona mas procedente di India, cu e anochi aki lo mester a crusa e frontera. E 7 otro personanan a wordo haya pa polis na e frontera e mesun anochi cu e famia a fayece. .
E grado di friedad di -35 grado celsius, ta imposibel pa un persona expone su mes pa oranan largo den dje, algun minuut mes ta di mas y mucho menos oranan largo sigur ta fatal.
E comunidad di India na Winnipeg a organiza e siman aki un oracion virtual pa e famia Patel.