ORANJESTAD – Recientemente, Minister di Husticia y Asuntonan Social Sr. Rocco Tjon a reuni cu directiva di Fundacion Contra Violencia Relacional (FCVR) pa asina firma un MOU cu ta nifica cu Ministerio di Husticia y Asuntonan Social lo bay traha mas di serca cu FCVR pa asina delinea kico ta e necesidadnan cu nan tin y con por maneha esaki na un miho manera.
Na luna di oktober aña pasa, a reuni y a palabra e pome pasonan cu FCVR. Esaki a nifica cu entrante 2022 lo bay sera un acuerdo hunto pa asina defini cua lo bira e puntonan cu lo bay traha riba dje como tambe delinea e proceso di con ta bay logra esaki. Den e MOU aki a palabra cu lo bay instala un comision por medio di un “Ministeriele Beschikking” pa asina defini e diferente tipo di proyectonan legislativo, proyectonan cu tin di haber cu e parti di maneho, pero tambe e cooperacion entre Cuerpo Policial y FCVR.
Segun e Mandatario, esaki ta un paso hopi importante, mirando cu algun tempo atras, durante un reunion cu Ministerio Publico, a logra wak e cifrasnan di e ultimo añanan tras di lomba, caminda a deduci cu e tipo di delitonan cu ta bin mas tanto padilanti ta e tipo di delito cu tin un toke di violencia y hopi biaha den e esfera domestico. Adicionalmente, den e MOU, ta tene cuenta tambe cu e parti di crea conscientisacion y brinda e informacion y workshopsnan, den e caso aki, na entre otro Cuerpo Policial pa asina e agentenan policial tambe por tin mas conocimento riba e materia aki. E ta hopi importante tambe pa e personal di Cuerpo Policial cu ta trahando pa varios aña despues di a termina cu nan estudio, pa por haya acceso na e informacion aki un bes mas.
Por ultimo, di parti di FCVR, a expresa tambe cu nan ta contento cu despues di 26 aña a logra yega na un aliansa cu Ministerio di Husticia y Asuntonan Social, pa loke ta e parti di abogacia, pa asina por coregi algun leynan cu tawata mara of cu tin mester di algun ahustacion.