ORANJESTAD – Tawata dialuna 17 januari 2022 cu Minister Oduber a presenta durante conferencia semanal di gobierno di Aruba, e exit strategy cu ministerio di salud a prepara. Durante e conferencia di prensa Minister Oduber a elabora riba 7 punto di importancia pa por sali for di e pandemia y percura pa ehecucion di e exit stratregy aki.
E mesun siman minister Oduber a presenta esaki na conseho di minister y tambe na crisis team. Conseho di minister y crisis team tawata di acuerdo cu e exit strategy y e approach di minister Oduber. Minister Oduber ta hopi satisfecho cu ambos grupo. Nos ta kere cu tin diferente instrumento awor pa por maneha e crisis.
Durante henter e crisis nos a purba crea e balansa entre salud y economia poniendo semper salud na prome lugar. Esaki lo keda asina tambe pero nos tin cu bai haci uso di otro modelonan tambe pa sali for di e crisis. Nos no por keda usa solamente e modelo di salud sino wak modelonan economico, laboral, financiero y cultural.
E approach aki di usa otro modelonan lo mester yuda nos siña biba cu e virus aki y focus riba nos recuperacion.
Nos a constata cu no obstante e cantidad haltisimo di casonan activo, nos no a sinti hopi presion den nos ICU. E variante Omicron ta menos peligroso pero hopi mas contagioso, locual a pone cu un gran cantidad di persona a haya esaki e ultimo luna.
Ministerio di salud a desaroya e exit strategy cu cautela pa percura pa na un forma responsabel sali for di e pandemia. Nos ta kere cu tin varios punto cu lo mester haya atencion y cu ta trahando riba nan. Nos ta premira cu den algun siman e plan aki lo wordo ehecuta completamente.
Crisis Team siman pasa ya caba a anuncia varios cambio flexibel y asina lo keda trece mas cambio flexibel te ora e exit strategy wordo ehecuta por completo.
Pais Aruba a mustra un biaha mas di ta entre e prome paisnan na mundo pa pensa riba e approach aki. Nos ta nota cu Corsow ta interesa den nos exit strategy, manera St Maarten tambe tin interes den esaki y por wak con Hulanda ta siguiendo den nos stapnan pa flexibilisa nan medidanan.
Nos pais a sufri hopi den tur sentido pa motibo di e pandemia di Covid-19. Pais Aruba ta e di 2 pais den henter mundo cu mas a wordo afecta pa e pandemia segun un estudio haci pa IMF. Awor ta momento pa hunto, na un manera responsabel nos laga los di e pandemia. Nos ta sinti e necesidad pa percura pa nos economia florece bek, nos tin cu sigui nos curso di recupracion di nos turismo, nos tin di crea oportunidadnan nobo y cuponan di trabou.
Aruba mester florece bek y mi ta convenci cu mas lihe nos actua, mas rapido nos ta bai recupera. Aruba tin un futuro briyante su dilanti y awor ta e momento pa crea e perspectiva pa e futuro aki. – Esakinan ta palabra di Minister Dangui Oduber.
Minister Oduber kier a gradici Prome Minister Wever Croes, coleganan den conseho di minister pa kere y confia den e exit strategy, gradici tambe miembronan di crisis team pa support di e plan aki. No ta tur ora ta facil pa tuma decisionan teniendo tur factor den consideracion. Manera a menciona salud ta keda mas importante pa nos, pero nos mester enfoca riba e otro modelonan tambe. Aruba mester di nos tur y hunto nos lo sali mas fuerte y resistente.