Durante un lezing na Universidad di Heidelberg, un studiante (18) a tira un otro studiante (23) mata y a herida tres otro. Despues e studiante di 18 aña a tira su mes mata. E studiante un rato prome di a comete e acto aki lo a pone un mensahe den direccion di esaki riba whatsapp.
E hoben (18) tabata un studiante na e Universidad di Heidelberg, e motibo tras di e acto tristo aki, ainda no ta conoci.
Heidelberg, Alemania: E Habitantenan di Heidelberg a keda den shock na momento cu un studiante(18) dialuna merdia, a los varios tiro den un collegezaal na Universidad di Heidelberg, den e tiramento aki un otro studiante femenino di 23 aña a perde su bida y tres otro hoben studiante a keda herida.
E studiante femenino di 23 aña a ricibi un tiro den cabes y un rato despues di su yegada na hospital e la fayece.
Dialuna merdia den careda di 12’or y 20, e studiante a drenta den e collegezaal caminda un grupo di studiante tabata atendiendo un lezing. E studiante hoben (18)a drenta den e zaal, cu dos arma di candela den su man y a cuminsa los tiro riba e studiantenan cu tabata atendiendo e lezing, despues e la huy bay pafo riba tereno di e universidad den e bario di Neuenheimer e la tira su mes mata, e motibo di su acto tristo aki, ainda no ta conoci. Un rato prome cu e la comete e acto aki, e la skirbi riba su whatsapp ” dass Leute jetzt bestraft werden müssen.“ (Hende mester wordo castiga awo). Asina chef di polis di Mannheim a informa dialuna anochi, durante un conferencia di prensa. Maske e message aki lo mester wordo bon verifica ainda. Banda di esaki, e la message tambe cu e no kier wordo dera den un santana banda di otro hende, pero lo kier wordo dera den lama.
Despues di e sucedido, como 400 polis a yega na e sitio, entre nan un taskforce special, helicopter di polis tambe tabata bula riba e campus di e universidad. Na inicio a pensa cu tabata trata di dos persona cu lo a tira den e collegezaal, pero e studiantenan cu tabata presente durante e sucedido a informa polis cu e studiante a drenta cu dos arma den su man. E studiante tabata tin mas di 100 municion den su poder, no ta conoci pakiko e lo tabata stop di tira pa un rato dje cuminsa bek, por ta pa recarga e arma cu mas municion, pero segun polis no por confirma nada, nan ta djis specula. Un cos ta sigur, no ta descarta cu lo mester por tin un motibo dicon e la mik net riba e studiante femenino di 23 aña y a tir’e den cabes.
Despues cu e studiante a pone fin na su bida riba e tereno di e Universidad, su rugtas a keda benta banda di e curpa. Pa tur seguridad polis a warda basta rato prome cu nan a accerca e curpa. Esaki pa motibo cu nan no tabata sa si acaso e studiante por tabata tin explosivo den e rugtas. E recherchenan di Baden-Württemberg a manda pidi expertonan di explosivo pa investiga den e rugtas prome cu e recherchenan por a acerca e curpa. Segun chef di polis e studiante tabata tin dos arma den su poder, un scopet y un pistool. E studiante (18) tabata di Mannheim. E armanan a wordo cumpra recientemente den exterior, e recherchenan a haya e recibonan. E informacionnan aki polis a duna prensa dialuna anochi durante un conferencia di prensa.
Segun e recherchenan awo mester sali na cla, ken ta bende un hende arma cu no tin permiso pa carga arma. Pa evita cu e bendedo di e armanan por wordo spierta di su hecho contra ley, polis no a menciona na cua pais e hoben a cumpra nan.
Segun autoridad di Heidelberg no tin un motibo religioso of politico tras di e crimen aki. E studiante no tabata tin antecedentenan penal, nan ta hay’e algo hopi raro y pa e motibo aki autoridad lo bay haci un investigacion hopi profundo. Lo bay tuma contacto cu tur persona cu e studiante tabata e ultimo simannan contacto cu nan, investiga tur sitio cu e hoben a bishita etc.
E studiantenan di e universidad a haya un baño di awa y a keda den shock ora nan a tende of tabata testigo di e tiramento aki. Nan nunca por a biba pensa, na nan Universidad, un colega studiante, riba dje nan tin examennan pa haci y tambe nan bida di studiante pa sigui. E noticia di e tiramento fatal a core hopi lihe rond. Algun studiante a haya sa via message, otro via medionan social, tin cu tabata na Universidad na momento di e sucedido aki y a manda e noticia pa nan coleganan studiante. E sucedido haci un impacto hopi grandi riba e studiantenan di e universidad.
