Home Politics PROME MINISTER Y MINISTER DI SALUD A REUNI CU PROME MINISTER Y...

PROME MINISTER Y MINISTER DI SALUD A REUNI CU PROME MINISTER Y MINISTER DI LABOR Y SOCIAL DI CORSOU

SHARE

Diabierna ultimo, Prome Minister Evelyn Wever-Croes hunto cu Minister Dangui Oduber, a reuni cu Prome Minister di Corsou, Gilmar Pisas y e minister encarga cu labor y asuntonan social na Corsou, Ruthmilda Larmonie.

Durante e reunion, varios tema a wordo trata. E tema di pandemia a haya hopi atencion den e combersacionnan. Prome Minister y Minister Oduber a duna un splicacion di e maneho di Covid en general na Aruba, e maneho di test, di cuarentena y e maneho cu a hiba pa mitiga e situacion pa baha e cifranan di Covid na Aruba. Prome Minsiter a expresa cu Gobierno ta hopi satisfecho con e maneho ta wordo implementa como tambe e manera cu nos pueblo ta duna di su banda pa baha e cantidad di casonan.

Nos mandatarionan di Aruba a elabora tambe riba e strategia di salida, ‘Exit Strategy’. 

 

Otro topico cu a wordo trata, ta e topico economico y social y e impacto cu esakinan a sufri debi na e pandemia no solamente na Aruba pero sigur tambe pa nos hermana isla Corsou. A papia di colaboracion di ideanan pa traha hunto pa crea mas oportunidad pa nos ciudadanonan di Aruba y Corsou. Prome Minister a indica cu a yega na palabracionnan pa intercambia cierto informacion, data y documentonan pa asina e islanan por sigui traha hunto. 

 

Riba e tema di Landspakket y e relacion den Reino y cu e Secretario di Estado nobo, señora Alexandra van Huffelen, a yega na palabracionnan pa tin mas aliniacion den e tareanan di e Landspakket. 

 

“Aruba y Corsou ta enfrentando retonan grandi y hunto, den union, nos por logra hopi cos mas pa nos pueblonan. E tawata un bon reunion na unda nos a intercambia di ideanan pa estrecha e lasonan di hermandad y di amistad y sigur di e compromiso pa sigui traha hunto”, Prome Minister Evelyn Wever-Croes a expresa.