Baby mucha muhe di apenas 11 luna tabata sinta den auto cu su mama na momento cu un homber a cuminsa los tiro, un bala perdi a alcansa e criatura den su cara,
lagando e mucha seriamente herida.
Bronx, NYC, Merca:
Diaranson den careda di 6’or y 45 anochi, un homber tabata coriendo tras di un otro na Fordham Manor districto di Bronx. Na dado momento e homber coriendo mas patras a saca un arma di candela y a cuminsa tira.
Dilanti di e Deli and Food tabata tin un mucha muher chikito di 11 luna sinta den auto cu su mama di 32 aña, nan tabata wardando riba e tata, cu a drenta e Deli & Food pa cumpra algo. Den e tiramento un bala perdi a alcansa e criatura den su cara, lagando e mucha gravemente herida.
E victima a wordo transporta cu sumo urgencia prome pa St. Barnabas Hospital y despues e victima chikito a wordo transporta pa Columbia Presbytarian. E mucha su situacion ta hopi critico pero stabiel.
Criminalidad ta aumentando den cayanan di New York, den e prome dos simannan di january 2022 ya caba tabata tin 52 tiroteo, di cual 57 persona a resulta herida. Esaki a aumenta cu 15.6% compara cu 2021.
E mayor nobo di New York Eric Adams durante su bishita na e sitio di e sucedido a bisa: “Si esaki no ta un wake up call, lo mi no sa kiko e ta. Mi no lo rendi, pa laga violencia tuma over e cuidad di New York.”
E criatura ta victima di un ola creciente di violencia na e cuidad. Eric Adams a bisa di ta determina pa caba cu violencia na e cuidad di New York.
Camaranan di seguridad di e negoshinan den cercania a capta e accion completo, for di ora cu e sospechoso tabata coriendo y na momento cu e la los e tironan. Polis te na e momentonan aki no a logra pone man riba e dos hombernan aki, ambos ainda ta den libertad.
E criatura diabierna awo lo cumpli 1 aña, e ta interna na Columbia Presbytarian, su situacion ta keda critico pero stabiel. Diaranson anochi e mayor di New York a bishita e criatura y su mayornan na Hospital.
