Home Politics Minister di Cultura ta invita pueblo pa celebra Dia di Betico den...

Minister di Cultura ta invita pueblo pa celebra Dia di Betico den Union – ‘Un pueblo uni, hamas por ser venci’

SHARE

 

‘Un pueblo uni, hamas por ser venci’

 

ORANJESTAD – Dia 25 di januari Aruba ta celebra fecha natalicio di Libertador Gilberto François ‘Betico’ Croes. 

 

Manera tur aña Gobierno di Aruba, pa medio di Ministerio di Cultura y Comision Celebracion Dianan Nacional ta organisa actividadnan pa celebra Dia di Betico. Di e forma aki Aruba ta dun’e su homenahe bon mereci y asina un y tur por keda recorda su lucha pa e gran logro cual ta Aruba su Status Aparte. E lucha cu ta di un historia inmortal.

 

Den e situacion actual nos no por tin e celebracionan na manera cu nos a custuma cune pero lo transmiti e celebracionan via canalnan di television y medionan virtual. Crisis Team a aproba pa e ceremonia di e Acto Protocolar por tuma luga cu un cantidad di invitadonan limita y tambe mester cumpli cu regla y protocolnan di seguridad, pa asina tene e situacion bao control y pa evita cu casonan ta aumenta. E invitacion ta bay na comunidad pa celebra Dia di Betico na cas den union familiar.

 

Manifestacion Cultural Virtual

E Manisfestacion Cultural lo tuma luga pa medio virtual y lo wordo pasa dialuna, dia 24 di januari pa 8’or anochi na tur canalnan di television local y tambe via medionan virtual. E programa ta contene presentacion di musica, canto y baile di nos talentonan local y discurso di e mandatario Minister di Cultura Sra. Xiomara Maduro. Henter comunidad ta ser invita pa sintonisa e programa cultural aki riba dialuna 24 di januari pa 8’or di anochi via nos canalnan di television y otro medionan virtual.

 

Acto Protocolar

E ceremonia di Acto Protocolar lo tuma luga diamars, dia 25 di januari pa 9’or di mainta, cu un cantidad limita di invitado segun e reglanan di Crisis Team. E programa ta consisti di yegada di mandatarionan y pa 9’or di mainta, e ceremonia oficial ta inicia. Lo tin presentacion di musiconan cu canto di nos muchanan, reflexion, poesia, discurso di Prome Minister di Aruba, Sra. Evelyn Wever-Croes y lo rindi homenahe na Sr. G.F. Betico Croes den feliz memoria.

Durante e Acto Protocolar lo mantene na tur regla y protocol di DVG y Crisis Team. No ta permiti publico asisti na e Acto Protocolar. E cayanan di Vondellaan y Rumbastraat lo 

wordo cera pa trafico y publico. Un invitacion na prensa pa ta presente y pa por cubri e ceremonia di e Acto Protocolar.

 

Competencia Virtual “Kibra Coco”

Ademas e aña aki ta introduci un evento nobo, cu ta un programa di competencia na television ‘Kibra Coco’, durante cual tur mucha di scolnan basico pa medio di tecnologia por participa hunto cu famia for di nan sala di cas y asina celebra Dia di Betico y gana premio pa nan mes, nan famia y nan klas. Ademas lo tin un ‘Betico Challenge’, cada alumno di scol basico por saca un selfie cu famia hungando ‘Kibra Coco’, mande via whatsapp na 597-2323 y participa pa gana premio. E programa lo ta diamars, dia 25 di januari y ta cuminsa pa 5‘or di atardi y lo pasa na tur e canalnan di television local. ‘Kibra Coco’ ta den forma di un quiz y ta consisti di diferente tanda di serie di pregunta, entrevista y interaccion y lo tin como anfitrion Jeancarlo Espinal. Esaki ta un programa cu lo sigui durante tur  celebracion nacional cu tin henter aña manera Dia di Himno y Bandera, Dia di Rey y Dia di San Juan Dera Gay.

 

E proyecto aki, Comision Celebracion Dianan Nacional ta realisa den cooperacion cu Telearuba, SETAR, Departamento di Cultura, Elite y un comision forma pa algun maestro di scol basico.

 

Material pa scol

E aña aki cu cooperacion di Archivo Nacional Aruba a traha un video cortico tocante ‘Historia di Nos Libertador Betico Croes’. Ta trata aki di un video den cual ta duna informacion riba Betico como hoben, cu su famia, e lucha y e logro di Aruba su Status Aparte. A ricibi cooperacion di algun maestro di scol basico y studiante na IPA – Bachelor Papiamento. E video aki ta un material educativo  y ta un preparacion pa tur alumno di scol basico pa e Competencia Nacional ‘Kibra Coco’ (Quiz) riba Dia di Betico.

 

Pa scolnan Preparatorio tin un Competencia di Pintamento. E pintura ta obtenibel digital pa download y lo sali tambe den corantnan e siman aki. Tanto e video como e pintura lo ta riba pagina di Facebook di Gabinete Wever-Croes, Departamento di Cultura y Youtube di Minister Xiomara Maduro. Tur participante por entrega nan pintura na nan scol no mas tarda cu dialuna dia 31 di januari na nan scol y miembronan di e Comision Celebracion Dianan Nacional lo percura pa buscanan na comienso di luna di februari proximo. Na luna di februari lo saca e tres ganadornan y lo entrega nan un premio.

 

E mandatario a gradici nos companianan estatal SETAR, Utilities group forma pa WEB, Elmar y Utilities Aruba, Refineria di Aruba pa nan aporte y asina yuda engrandece e celebracion di Dia di Betico.

 

Pa prensa lo tin disponibel un link pa tur medionan cu ta desea di transmiti e eventonan. Tur medio lo ricibi un carta di Comision Celebracion Dianan Nacional cu tur informacion e siman aki. E mandatario ta gradici tur medio di comunicacion di antemano pa nan cooperacion.

 

E dignatario a termina recordando un y tur pa subi bandera na cas y pone banderin na auto pa asina celebra Dia di Betico. Ban celebra Dia di Betico den union familiar na cas y den tur seguridad e mandatario a termina bisando y ta desea henter Aruba un, Feliz Dia di Betico.