Awe mi kier a continua cu e informacion cu e expertonan di WEB a comparti cu nos Diamars mainta januari 11. Tabata un sesion hopi interactivo y masha hopi pregunta y duda a wordo contesta y clarifica. Pero prome cu mi haci esaki, mi kier subraya con oposicion kier haci pueblo pensa cu nan ta critico y genuino den nan expresionnan encontra di expertonan di WEB, y e Proyecto di Eagle LNG Gas. Oposicion no a tribi di yega na un mainta di informacion pasobra nan tabata sa cu nan poniencianan y storianan inventa lo keda na berguensa dilanti tur hende. Ora bo no debe nada bo no ta teme nada toch? Oposicion a prefera grita den prensa y den e medionan social tur tipo di cos pa trata na hustifica nan ausencia. Si di berdad ta contesta boso tabata busca, y interes di pueblo boso ta lucha pe, boso tur lo a yega na careda pa a haci boso preguntanan e mainta aki.
E hecho ta cu AVP kier a bin cu e mesun Proyecto aki y a bisa na 2018 den un articulo cu nan a post riba nan website, y mi ta quote; “Nan (GasUnie) tabata interesa pa traha hunto cu Gobierno di Aruba y Utilities y WEB, inverti si ta necesario, pues pa ta un partner den e proyecto. E proyecto a wordo ehecuta, tur e plannan a wordo traha, visibility studies y business plan ta traha. E parti ingenieria y analisis tambe a wordo haci..
Ripara cu nan mes ta bisa cu e Proyecto tabata cla, tur plannan traha, visibility studies y business plan ta traha! E parti ingenieria y analisis tambe tabata cla! Awor si tur e conocimiento ey boso tabata tin di e proyecto, con por ta cu awor ta pretende di no sa nada y cu tin mil pregunta y insinuacion ridiculo? Insinuacion ridiculo, pasobra tur rapport, investigacion, analisis, ingenieria y business plan traha for di 2018 cu ta duna nan tur contesta riba e Proyecto di LNG Gas aki na Aruba!
Tambe e articulo ta bisa esaki; “Nos sa cu pasobra e ta un proyecto cu Gobierno anterior (AVP) a traha riba dje y tabata full cla, nan no kier ehecuta esaki. E ta lastima pasobra den cierto casonan, ora cu proyectonan ta bon ,mester tin continuacion.”
Awor gobierno a duna continuacion, manera boso a urgi pero esey tampoco no ta bon. Si kier papia di hipocresia esaki ta esun di mas grandi. E actitud aki ta hopi lamentabel. Un Proyecto cu nan a gaba masha, a prepara pe y aworaki a wordo realisa pa gobierno actual! Un Proyecto cual nan tabata sa ta super beneficioso pa Aruba. Ainda pueblo por kere oposicion tin pueblo na pecho?
LNG Gas ta un parti vital di WEB su vision, pasobra e ta trece mehoracion pa nos medio ambiente, y adicionalmente e ta baha e prijs di awa y coriente. Ora cu e produccion ta cla pa cuminsa na 2024, WEB lo ta operando 50% di su motornan riba Gas Natural di Eagle LNG. Pa 2026 WEB ta proyectando cu su motornan lo ta funcionando 100% riba gas natural y lo baha e consumo na mas di 1900 bari di fuel pa dia!
Eagle LNG awor tin cu cumpli cu tur permiso pa e contract por cana. Nan ta responsabel pa transporta e LNG, construi e facilidad di LNG Gas, e bunkering station, core tur tuberia y ta responsabel pa e gas yega WEB. E contract di WEB ta un Gas Delivery Agreement. Kiermeen tur demas gasto ta pa cuenta di Eagle LNG. E vision di futuro pa WEB ta pa expande energia renovabel. WEB kier reemplasa e Molinanan di biento na Vader Piet pa 2029 cu molinanan mas grandi, mas moderno y cualnan lo ta 12% mas eficiente y cu un technologia cu lo produci mas energia cu menos costo.
Den conclusion mi kier a expresa mi gradicimento na tur experto di WEB Aruba NV cu ta hendenan bon studia, cu hopi experiencia y cu un vision di energia solido pa nos pais. Ta lamentabel cu politica sushi mester wordo hunga pasobra tin hende hamber pa poder. Pero semper mi lo para pa un proyecto cu ta beneficioso pa nos pais y den cual nos tur lo cosecha su fruta. Danki tambe na minister Glenbert Croes pa e “buitendag” fructifero aki pa Parlamento, cual tabata uno hopi educativo y cu a laga niun duda cu e decisionnan corecto a wordo tuma den e cuadro di energia pa Aruba!