Home Politics Pakico Mike Eman a fracasa como lider politico? Ora cu un...

Pakico Mike Eman a fracasa como lider politico? Ora cu un lider den apenas 8 aña a manda su partido y pais den precipicio, e mester tuma honor na su mes y retira!

SHARE

E  prome tironan di aña 2022 no a caba di resona cu ya e lider di AVP, Mike Eman a cuminsa cu su disparatenan contra nos gobierno y en especial contra nos Prome Ministro Evelyn Wever Croes. Sin duda a keda demostra un biaha mas cu Mike Eman si tin curashi ora cu e ta hinca e palabranan ‘responsabilidad’ y ‘pobresa’ den su boca. Hecho ta cu si tin un lider iresponsabel pa loke ta finansas publico, esey siguramente ta Mike Eman. Y si tin un lider cu a causa pobresa den e pais aki, esey tambe ta pa cuenta di e mesun Mike Eman aki cu a malgasta tur e fondonan publico y a fia y sigui fia.

 

Votegetter di Aruba

Un biaha mas por a sinti cu e hecho cu sra. Wever Croes a bira e votegetter di Aruba den e ultimo eleccion obteniendo 7518 voto, cu esaki a trece hopi rabia y envidia cerca Mike Eman, ya cu e mes a bay atras cu 1154 voto den e ultimo eleccion. Pero ta incomprendibel cu te ainda Mike Eman kier pretende cu e tin un rol di importancia pa hunga den politica na Aruba y cu e tin solucion pa tur problema cu ta existi den e pais aki. Sinembargo tur cos ta mustra cu Mike Eman a fracasa y cu su añanan den politica a pasa dia bieu caba.

 

Negoshinan familiar bancarota

Manera MEP semper a trece padilanti cu Mike Eman hunto cu algun ruman nunca por a maneha su propio negoshinan di famia: Mester a bende Aruba Aloe, a manda e negoshi di flanel tres biaha failliet, a logra pa Interbank bay failliet sin paga e Recovery bank y finalmente a logra manda e planta di television ATV bancarota y sin paga su trahadornan. Pues si ni bo propio negoshinan bo por a maneha exitosamente lagando debenan grandi atras, ta con bo por pretende di kier sigui maneha henter un pais manera Aruba?

 

Desaster financiero

Cu Mike Eman tambe tin mal maña pa maneha placa di pueblo esey por ser comproba ya cu na 2009 Mike Eman a hereda 970 miyon florin for di Gabinete Oduber. Den un tempo record Mike Eman a derocha henter e suma aki, e.o. a yena su gobierno cu mas di 400 coordinador kendenan a keda lepia na cas y cobra ya cu no tabatin lugar pa tur sinta den Bestuurskantoor. Ora cu el a caba di malgasta e casi 1 Biyon florin aki, Mike Eman a cuminsa fia, fia y sigui fia cu no tabatin final. Asina el a logra crea entre 2010 pa 2017 un total di 2.2 Biyon florin extra na debe. Ora di a caba di derocha henter e suma di fiansanan biyonario aki, Mike Eman a dicidi di bin cu e proyectonan PPP cu placa fia y cu a costa nos pueblo un otro 1.6 Biyon florin y di cual e gobierno actual mester a cuminsa paga entrante 2018 un suma di 85 miyon florin pa aña y pa 30 aña largo. Tabata durante e periodo aki cu Mike Eman – danki na su maneho financiero desastroso – a haya un KB, Aanwijzing for di Hulanda y como toetje a haya un CAFT riba su lomba. Ni e supuesto welga di hamber e tempo ey Mike Eman no a sa di maneha esaki drechi y e mester a bandona e locura di welga aki, sin pena y sin gloria.

 

AVP a bay atras cu 6 asiento

No mester lubida cu debi na e malmaneho y desaster financiero aki, Mike Eman a ser castiga den e eleccion di 2017 caminda AVP a bay atras cu 4 asiento y 9727 voto. Mirando e fracaso aki na prome instante Mike Eman riba e anochi di eleccion y bao yoramento a dicidi cu e ta bandona politica activo y hasta a nenga su asiento den parlamento, pero despues di algun luna Mike Eman a bolbe flip flop y a dicidi di sigui lidera AVP.

 

Den e siguiente eleccion na 2021 un biaha mas Mike Eman su liderazago a ser debilita ya cu AVP a bolbe bay atras cu 2 asiento y 5041 voto. Resumiendo por constata cu den apenas 8 aña (2013-2021) Mike Eman a manda su partido te den precipicio cu un caida di 6 asiento y 14768 voto. Pues un lider fracasa totalmente! Haciendo un analisis di e cifranan aki, estadisticamente y segun e trendline, AVP lo yega na solamente 10 mil voto of menos den e eleccion di 2025. E grafico adhunto ta papia pa su mes.

 

Mas fracaso di Mike Eman

Mike Eman a mustra su fracaso tambe na 2021 ora cu el a bay Corte pa exigi pa su partido haya e kiezersregister y cual demanda a ser rechasa pa hues. Y pa completa e fracaso di Mike Eman, el a bin cu e locura cu su partido tabata falta solamente 52 voto den eleccion pa logra 8 asiento y ta p’esey el a exigi reconteo di voto. Aki tambe el a haya su derota den Corte. Pues ni Kiezersregister ni Reconteo!

Awe 6 luna despues di e eleccion, ainda Mike Eman kier sigui tira santo den wowo di pueblo y tur dia mediante su satelitenan ta instiga pueblo contra e gobierno actual y cual gobierno ta haciendo tur esfuerso pa saca nos pais for di e pos cu Mike Eman y AVP a hinca nos aden. 

 

Sin duda cu e gobierno bao di liderazgo di sra. Evelyn Wever–Croes tin e boluntad y capacidad pa recupera nos pais un biaha mas, tanto pa  loke ta e desaster financiero cu Mike Eman a crea como e efectonan devastador di e pandemia mundial. Ta p’esey un conseho ta bay pa Mike Eman: Si bo no kier yuda, no stroba tampoco!