Home Politics Eman na Rutte na vispera di un Gabinete Rutte nobo: INTRODUCCION...

Eman na Rutte na vispera di un Gabinete Rutte nobo: INTRODUCCION DI BASISBEURS MESTER CONTA TAMBE PA STUDIANTENAN DI CARIBE HULANDES !

SHARE

Den un carta formal dirigi na Minister President Mark Rutte e lider di fraccion di AVP, mr. Mike Eman, a cuminsa na felicita e promer mandatario cu su di cuater gabinete. Eman ta desea Rutte hopi exito, sigur mirando e temponan difícil cu nos ta bibando.

Banda di un mensahe general di pensamentonan riba cooperacion den Reino ta hala atencion e apelacion directo y specifico di e lider di fraccion di AVP, mr. Mike Eman na Premier Rutte riba e tema di beca pa estudio. Eman ta referi den su carta na Rutte na e palabracion haci entre e partidonan di coalicion cu Gabinete Rutte IV riba re-introduccion di un basisbeurs pa tur studiante na Hulanda. Den su carta Eman ta haci un apelacion riba Rutte pa mira e tema aki “Koninkrijk breed” y haci e basisbeurs aki un “Koninkrijksbasisbeurs”.

Eman ta bisa Rutte di a tuma nota cu hopi placer di proposicion den acuerdo di coalicion pa re-introduci un basisbeurs pa tur studiante. E ta mustra den su carta cu educacion ta di gran importancia pa e desaroyo y fortalecimiento structural y continuo di cada pais y e vinculonan dentro di Reino. E importancia di educacion ta aun mayor pa comunidadnan chikito cu ta depende den gran parti riba e capacidad y e compromiso di su propio hendenan. E desaroyo rapido di Aruba desde 1986, hunto cu e expansion y e fortalecimiento di educacion y e impacto grandi cu introduccion di e concepto di Fianza pa Estudio di Aruba acopla na esun di Hulanda tabata tin riba e cantidad di hobennan cu por a bai studia ta un ehempel grandi di esaki.

Nos mester garantiza, Eman ta bisa den su carta na Rutte, cu acceso na educacion pa tur mester worde considera como un obhetivo universal y cu mester sigui worde reenforza dentro di Reino como un obhetivo comun. Pa e razon aki, Eman ta expresa na Rutte cu e lo kier propone pa amplia e “basisbeurs” contempla y pone den cuadro di un areglo basico pa henter Reino di cual tur studiante den Reino por haci uso igual. Eman ta bisa cu esaki lo ta un alivio grandi pa e problematica di debe riba fianza pa estudio. E ta mustra cu Aruba ya desde 2010 a bin ta tuma inicitivanan pa ofrece e alivio aki cu descuento riba debe pa estudio y tambe haci cu e pagaonan riba e debe aki por worde desconta for di impuesto. Tambe Eman ta referi na e Erasmusbeurs den contexto di Union Europeo pa cual tambe studiantenan di Aruba y demas Caribe Hulandes ta bin na remarca. Eman ta enfatisa cu metanan di desaroyo sutenibel (SDGs) pa mihor calidad di bida pa un y tur tambe ta worde mira como obhetivonan comun den Reino.

Eman ta termina su carta den un tono amicabel cu Promer Minister Rutte: “Beste Mark, al met al hoop ik vurig dat jouw Rutte IV bij de (her)invoering van de basisbeurs deze zal willen uitbreiden voor alle studenten in het Koninkrijk. Het is een investering die zich juist in het Caribisch deel van het Koninkrijk zal terugverdienen, want als onze jongere generatie meer en beter onderwijs kan volgen, zal zich dit uitbetalen in weerbaarheid en veerkracht van de eilanden in en na tijden van crisis en tegenslag. De zware afgelopen jaren met de pandemie hebben ons weer urgent met de neus op de feiten gedrukt.

Maandag staat je nieuwe ploeg op het bordes. Vanuit Aruba zullen we de ploeg aanvuren en veel succes toewensen, in het belang van een sterk en gemeenschappelijk Koninkrijk!”. Fractieleider AVP, mr. Mike Eman.