Home Politics 100 Dia di Gobernacion – Minister Geoffrey Wever

100 Dia di Gobernacion – Minister Geoffrey Wever

SHARE

 

 

Desde cu Geoffrey Wever a huramenta como Minister di Asuntonan Economico, Comunicacion y Desaroyo Sostenibel riba dialuna 20 september, dibiaha a cuminsa cu trabounan pa den cuadro di su vision, duna forma y contenido na su maneho pa su carteranan. 

 

Como Minister nobo tabata importante pa cera conoci mas di cerca cu e stakeholders cual ta partners esencial pa e desaroyo y implementacion di maneho pa futuro. Un total di mas di 150 reunion a tuma luga den e prome 100 dianan di gobernacion, cu directornan di departamentonan di Gobierno, stakeholders di sector priva y demas inversionistanan. 

 

E prome simannan di gobernacion, Minister Wever a dedica tempo pa reuni cu tur e departamentonan y entidadnan di gobierno cu ta cai bou su cartera. Minister Wever a bishita entre otro Directie Economische Zaken, Handel en Industrie, Centraal Bureau Statistiek, Dienst Telecommunicatie Zaken, Bureau Intellectueel Eigendom, Sedeco, Sociaal Economische Raad, Free Zone Aruba N.V., Post Aruba N.V. y Setar N.V. Tambe a bishita Banco Central di Aruba. 

 

Pa cumpli cu e promesa di reduci “red tape” y “the cost of doing business” minister Wever a reuni cu varios stakeholders pa asina por incorpora nan sugerencia den e proyecto di elimina “red tape” cu lo inicia otro aña pa asina percura pa tin un business environment mas dinamico y flexibel. 

 

Plan pa e revitalisacion di centro di cuidad di Oranjestad y San Nicolas ta un prioridad pa Minister Wever, y a inicia cu Minister Wever teniendo varios reunion cu banconan, inversionistanan, comerciante y departamentonan di Gobierno pa asina hunto por dicidi kiko e vision ta pa Oranjestad y San Nicolas.

 

A tuma e iniciativa pa organisa Christmas Shopping nights pa asina sostene nos comerciantenan y stimula economia local durante e dianan di fiesta. Esaki por wordo mira como un prome paso pa revitalisa Caya G.F. (Betico) Croes. 

Calculacionnan y estudionan preliminario a wordo haci pa sondea e posibilidad di reubica varios departamento di gobierno pa centro di cuidad. Esaki no solamente lo crea asina flow adicional di persona den centro di ciudad, pero tambe lo fungi como posibel clientela pa e comerciantenan. Den e forma aki por crea un “spin-off effect” di comercio den e area y por fungi como inspiracion y sosten financiero pa otro empresarionan cu por ta interesa.

 

Minister Wever a tene varios reunion cu expertonan pa explora posibilidadnan pa hidrogeno como fuente di energia di futuro pa Aruba, aquafarming y agricultura moderno, y ki rol nan por tin den un economia local mas diversifica. 

 

Economia circular tambe ta un prioridad pa Minister Wever, y a intercambia cu varios experto local y internacional cu kier traha cu Aruba riba e tereno di economia circular. Hunto cu otro departamentonan di gobierno lo haci estudionan specifico con pa haci e transicion di un economia linear pa un economia circular.

 

Den cuadro di proteccion di consumidor y tambe di personanan cu ta huur, Minister Wever a percura pa e huurbescherming wordo incorpora bou di e responsabilidad di Sedeco, cu awor lo bai wordo formalisa. Tambe ta trahando hunto cu Sedeco pa mehora e proteccion di e consumidor y e huurder y bin cu un campaña pa informa e consumidor di su derechonan. 

 

Minister Wever a defende den Parlamento di Aruba e cambio di e Prijzenverordening y e Landsverordening tijdelijke loonsubsidie, cual a wordo aproba unanimamente.                                                                                    

 

Minister Wever a entrega peticion na Conseho di Minister, cual a ser aproba, pa instala un Comision cu lo traha riba implementa un Sistema Nacional di Estadistica (National Statistical System (NSS)) cu ta un sistema pa colecta, procesa y comparti data na un forma centralisa.  

 

Tambe a entrega conhuntamente cu Minister di Finansas y Cultura un peticion pa introduci un proceso nobo den entrega y evaluacion di aplicacion pa inversionnan cu gobierno ta haci, cual lo ser inclui den presupuesto di Aruba pa aña 2023, cu a wordo aproba dor di Conseho di Minister.

 

Den cuadro di Climate Action, partnership y colaboracion internacional ta absolutamente essencial. Minister Wever a tene session di dialogo cu studiantenan di Universidad di Aruba tocante Climate Change, cual a solidifica e pensamento cu Aruba berdaderamente mester cana un caminda mas sostenibel.  

 

E tabata un honor pa por a representa Aruba na COP 26 na Glasgow, caminda a tene varios reunion cu stakeholders internacional y den reino Hulandes kendenan por fungi como colaborador of sostenedor di proyectonan sostenibel di futuro.

 

Minister Wever a fungi como orador na e siguiente eventonan ATIA Mixer, ATIA Corporate Event, Futura Immerse Week y Aruba Public Sector Consultation for Voluntary National Review 2022. 

 

Hopi di e cambio of mehoracionnan lo nifica cambio den legislacion. Minister Wever ta determina pa implementa e cambionan cu ta necesario pa por trece cambio den nos modelo economico y empuha desaroyo sostenibel.