Home Local Esunnan cu a habri e hotel ta sigura: Na Marriott Resort asociadonan ta...

Esunnan cu a habri e hotel ta sigura: Na Marriott Resort asociadonan ta haya tur herment pa crece

SHARE

 

 

ORANJESTAD, Aruba – Asociadonan di Aruba Marriott resort & Stellaris Casino ta insisti cu nan doño di trabou ta brinda nan un trato mescos cu famia y cu ta cu placer nan ta lanta bay traha tur dia. Prome cu nan kier a realisa, ya 25 aña a pasa y entretanto ya 26 aña a pasa bay caba. Nan ta insisti cu nan ta sinti di ta trahando na cas y no kier ni pensa riba pensioen of pa stop di traha, tanten cu salud ta permiti.

 

Marriott a cumpli 25 aña na Aruba aña pasa pero door di pandemia no por a celebr’e. A cambia tur cos pa e aña aki, pero atrobe a haya nan mes stroba pa e mesun motibo. A dicidi pa celebra cu e trahadonan individual, a percura pa nan haya nan respectivo regalonan, homenahe y anuncianan interno, pero awor kier pa publico general sa tambe ken ta e grupo cu a habri e hotel 26 aña pasa y cu ainda ta traha fielmente cu nan.

 

Hilda Feliz ta trahando cu Marriott pa 25+ aña y awendia e ta Housekeeping Supervisor. Prome cu esey e tabata traha riba piso pa hopi aña. Despues di e pandemia, a reahusta e areanan publico pa observa y verifica e hand sanitizer como cuido di huesped y empleadonan mes. Trahando pa mas di 25 aña pa Marriott ta nifica hopi. A haya hopi ilusion, orguyo, un enseñansa inolvidabel y esey ta algo cu e no por lubida nunca. 

 

El a cuminsa como camarera y no a dura mucho cu a promov’e como supervisor di piso. El a traha den apertura di tur cinco edificio, esta desde Marriott Resort te na Marriott Surf Club. Su experencia mas bunita y espectacular tabata con nan tabata subi cu flashlight. E experencia mas sentimental tabata e prome huesped cu a subi su piso y nan por a hacie manual. Esaki tabata algo increibel y un experencia cu e no lo lubida nunca.

 

Pa Alba Montenegro, traha cu Marriott ta un honor y placer. Su obhetivo personal ta pa yuda su famia. El a cuminsa den posicion di ayudante di coki y awo e ta coki di linea. Montenegro a traha den tur cushina cu Marriott tin. E ta orguyoso di por sigui traha cu Marriott, di cumpli cu su obhetivo pa famia y p’e empresa. Un impacto cu su trabou a haci pa su famia ta cu tempo a pasa un temblor grandi y danki na su trabou, e por a yuda su famia na Colombia. El a conta cu sosten di Marriott y semper a haya nan sosten ora tabata necesario.

 

Raymond Ryan Ridderstap ta trahando tambe pa mas di 26 aña cu Marriott, cual ta un compania sublime pa traha cu ne. E compania ta trat’e como famia. E intencion ta pa sigui hiba e compania dilanti y p’e sigui crece. Ridderstap a cuminsa como dealer y awe e ta Pit Manager na Stellaris Casino. Tin hopi oportunidad pa crece, pero tur cos ta depende di e persona si e kier sigui crece cu e compania. Marriott ta duna e empleadonan tur herment pa traha y oportunidad pa crece. Tur cos ta depende n’e persona mes.

 

Empleadonan fiel na Aruba

E compania ta considera e grupo di 113 empleado, cu a habri e hotel dia 31 di augustus 1995 y cu ta trahando te awe, como nan “charter team”. Na mundo, ora revisa tur e propiedadnan di Marriott, sin duda cu Aruba tin un di e nivelnan di mas halto di trahadonan fiel cu a keda cu e compania desde su apertura. No ta un desaroyo normal, pues e ta bisa algo di e forma con e compania ta trata su empleadonan, e compromiso cu e tin cu nan pa nan bienestar, progreso, educacion y crecemento den e compania. Charter Team di un compania ta e prome ekipo, cu normalmente ta esun cu ta habri e caminda, explora e miho forma di traha, crea protocolnan interno cu despues di 25 aña ainda ta vigente y ta percura pa un servicio sin igual, cu ta sigui atrae huesped pa e hotel.

 

Tocante Marriott Aruba

Aruba Marriott Resort & Stellaris Casino a habri dia 31 di augustus 1995 cu 411 camber y despues a añadi 3 camber mas na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. En total, e famia di Aruba Marriott & Stellaris Casino ta consisti di mas o menos 1200 empleado den servicio directo. E compleho di Aruba Marriott & Stellaris Casino ta esun di mas grandi den henter Caribe, tanto den cantidad di camber como den cantidad di empleado.