Home Politics Minister Dangui Oduber CEO DI ARUBA AIRPORT AUTHORITY N.V. A...

Minister Dangui Oduber CEO DI ARUBA AIRPORT AUTHORITY N.V. A PRESENTA E “MULTI ANNUAL CORPORATE STRATEGY” 2022-2026

SHARE

ORANJESTAD – Diaranson Minister Dangui Oduber a reuni cu CEO di Aruba Airport Authority N.V. (AAA) Sr. Joost Meijs den cuadro di e presentacion di e “Multi Annual Corporate Strategy” 2022-2026 di AAA. Den e documento aki AAA ta delinea henter nan strategia y e direccion cu nan lo kier tuma durante e proximo 4 añanan pa por cumpli cu e ambicionnan cu nan tin como compania. Tambe pa mustra con den termino largo lo yega na e aspiracion final pa aña 2030.

Manera ta conoci aeropuerto ta trahando duro riba e proyecto di “Gateway 2030” cu ta un proyecto di expansion di nos aeropuerto. E proyecto aki ta hopi grandi den su totalidad y alaves importante pa Aruba su turismo, economia y e aeropuerto mes. AAA su meta ta pa sigui crese como compania dunando e mihor servicio awo, den futuro y den bon colaboracion cu tur nan empleadonan directo y tur stakeholder cu ta forma parti di aeropuerto.

Minister Dangui Oduber ta contento cu AAA ta sigui e vision y maneho di Ministerio di Turismo caminda e aspiracion nobo lo bay conforme e rekisitonan economico, ambiental y social pa por haci e diferencia di ta un aeropuerto mas sostenibel den region di Latino America y Caribe.

Minister Dangui Oduber a keda masha satisfecho cu e presentacion cu e la ricibi di Sr. Meijs y ta hopi optimista pa cu e futuro di Aruba Airport Authority N.V. Un pabien sigur na e team di AAA cu ta trahando duro pa hiba nos turismo y Aruba pa dilanti. Aruba ta recuperando y aña 2022 ta mustra di ta un bon aña pa nos tur.