ORANJESTAD – Diasabra ultimo Minister di Turismo y Salud Publico Sr. Dangui Oduber a yega Aruba riba e vuelo inaugural di Frontier Airlines for di Miami. Minister Oduber a expresa di ta hopi contento di por a experencia henter e proceso di Miami te cu na Aruba. Esaki a sosode hunto cu un delegacion di AAA y ATA cu tambe tabata abordo di Frontier Airlines.
E mandatario a comenta cu ya pa hopi tempo caba Ministerio di Turismo y e team di Aruba Airport Authority tabata den negociacion pa por a yega na un acuerdo cu Frontier Airlines, pa lansa e vuelo inaugural aki. Frontier Airlines su base ta na Denver, Colorado y nan lo ta uzando Miami como un hub pa bin Aruba. Nan tin mas di 100 ruta di cual 30 ruta ta conecta cu Aruba. Awor nos localnan por haci uzo di e servicionan di Frontier Airlines y bula na un manera mas economico. Segun e mandatario esaki ta cuadra cu e vision cu gobierno tin pa diversifica mercado den e mercado grandi na Merca y no ta descarta cu pronto por tin vuelo directo for di Denver.
Minister Oduber a menciona cu e cifranan di turismo cu ta proyecta pa aña 2022 ta mustra hopi positivo. Segun e mandatario e cantidad di asiento disponibel pa aña 2022 ta mustra cu lo surpasa esun di aña 2019 cu tabata un aña record pa Aruba su turismo. E vuelo inaugural aki ta demostra e confiansa cu Frontier Airlines tin den Aruba como pais. Apesar cu mundo ta pasando den temponan dificil door di e pandemia, toch Frontier Airlines a tuma iniciativa y a dicidi di habri e ruta nobo aki di Miami pa Aruba.
Frontier Airlines ta e aeroliña mas “green” di Merca actualmente. Nan ta enfoca hopi riba cuida y proteha naturalesa. Nan tin un flota di 100 avion nobo di Airbus A-320 Neo den nan servicio. E avionnan aki ta uza menos carbon den comparacion cu otro avion jet. Segun Minister Dangui Oduber gobierno su vision y maneho ta basa riba turismo sostenibel y Frontier Airlines su filosofia ta cuadra cu esaki.
Cada un di e avionnan di Frontier Airlines tin un diseño diferente na e rabo di avion. Cada un tin un pintura riba e rabo di diferente animalnan cu ta wordo proteha. E pintura nan aki ta sirbi pa educa nos riba e animal mamifero of parhanan cu ta core peliger di extincion. Aruba tambe ta compitiendo pa tin su mesun parha riba un di e avionnan di Fontier Airlines. E ganador di e ecompetencia aki lo wordo anuncia na januari 2022. Aruba ta competiendo cu un pintura cu a wordo yama “Kiki e Prikichi”.
Minister Oduber kier a gradici partnersnan AAA (Air Service Development) y ATA, y tambe tur otro partner pa e logro aki.
