Home Dutch Kingdom Dutch Caribbean Nature Alliance ta trata tres topico critico durante e convencion...

Dutch Caribbean Nature Alliance ta trata tres topico critico durante e convencion na caminda

SHARE

Kralendijk – E siguiente convencion di Dutch Caribbean Nature Alliance (DCNA) lo enfoca riba maneho, cambio di clima y envolvimento di hubentud den conservacion di naturalesa. Tur seis organisacion pa maneho di parke nacional di e islanan cu ta forma parti di Reino Hulandes den Caribe ta uniendo forsa pa fortifica politicanan pa maneho strategico di naturalesa pa e añanan cu ta bini. Patrona di DCNA, Su Altesa Real Princesa Beatrix di Hulanda, tambe lo asisti na e convencion cu lo tuma luga di diamars 23 pa diabierna 27 di november na Corsou.

 

Maneho den tempo di recuperacion

E trastornonan significativo cu e pandemia a cousa a recorda nos cu nos ecosistemanan ta critico pa nos alcansa exito, siendo islanan chikito den desaroyo. Futuro desaroyo den e temponan dificil aki mester ta duradero, cu e meta pa conserva e biodiversidad di nos islanan, cu na su turno ta sostene e producto turistico unico di e islanan di Reino Hulandes den Caribe.

 

Un di e actividadnan cu ta destaca durante e convencion ta e reunion di directiva, cu pa prome biaha lo tuma luga en persona despues di casi dos aña di reunion virtual. Tadzio Bervoets, director di DCNA a indica cu “a pesar di e conviccion cu nos por alcansa mas dor di uni forsa, nos ta realisa cu maneho ta mesun importante. Esaki ta e motibo dicon nos reunion di directiva lo atende cu nos structura di maneho y nos vision strategico pa e temporada benidero.”

 

Cambio climatologico

E seis islanan di Reino Hulandes den Caribe ta saliendo di e efectonan di e pandemia. Sinembargo, e region di Caribe mes tambe ta experenciando un otro crisis cu lo tin impacto significativo riba e ecosistemanan cu ta asina crítico pa e economianan duradero cu mester construi. Un di e workshopnan na e convencion lo enfoca riba resistencia pa cambio di clima. E topico aki no por tawata mas oportuno, considerando lidernan global su compromiso renoba pa mantene subida di e temperatura averahe global bou di 2° Celsius. Presidente di directiva di DCNA, Hellen van der Wall, a indica cu “Caribe tin un posicion geografico prominente den e crisisnan climatologico y solamente uzando e producto- y servisionan cu naturalesa ta brinda nos, nos islanan di Reino Hulandes den Caribe por bira sociedadnan resistente.” E workshop aki lo tira lus riba un proyecto piloto cu ta trata na analisa y compronde e impacto di cambio di clima riba areanan marino proteha na Indonesia y den Caribe. E meta di termino largu di e proyecto aki ta pa organisa un programa di investigacion muchu mas elabora cu lo yuda desaroya intervencionnan contra e consecuensianan dinamico di cambio climatologico.

 

Envolvimento di hubentud

Durabilidad ta encera cumpli cu necesidadnan actual, sin compromete e siguiente generacion pa por cumpli cu esnan di dje. Cu e conosemento aki DCNA ta considera hoben un grupo di interes crucial den nan trabou. For di 2019 e convencionnan di DCNA ta inclui un simposio pa hoben, cu ta brinda nan un plataforma pa comparti nan punto di bista. Nan aporte a mustra di ta valioso durante añanan. Danki na nan aporte a crea programanan di naturalesa pa hubentud. E aña aki tambe lo figura durante e simposio combersacionnan dirigi riba e importancia pa inverti den enseñansa tocante naturalesa, pa asina yuda crea hobennan cu ta sinti nan mes responsabel pa areanan natural. A pesar cu e generacion di embahadornan di medioambiente cu ta na caminda ta parse di ta inclina pa practica uzo responsabel di recursonan natural disponibel, ta imperativo pa ofrece nan e hermentnan necesario for di ora nan ta hoben.

 

Pa mas informacion tocante e convencion di DCNA por bishita e pagina di Facebooc di DCNA: DutchCaribbeanNatureAlliance.