ORANJESTAD – Awe mainta Hues di Corte di Husticia di Aruba a dicta sentencia den e caso penal cu Ministerio Publico a cuminsa contra e homber Derwin P.
Aruba Native por a compronde cu Hues a confirma e exigencia di Fiscal, kende 2 siman pasa a exigi 3 aña y 6 luna di prison pa P.
Via video conference e sentencia a tuma lugar, caminda P. tabata den un oficina na KIA mientras cu Hues, Fiscal y abogadonan tabata den sala di Corte.
Dos siman pasa, tratamento di e caso a tuma lugar caminda Fiscal a bisa Hues cu e ta haya legalmente proba cu P. a viola e dama O. cu violencia riba 14 April 2021. Na opinion di Fiscal, P. mes ta admiti di a dal O. na cabez y pia. Tambe P. a bisa cu nan tabatin relacion sexual.
Fiscal a remarca cu por mira e mesun comportacion di P. na 2019, ta ripiti dia 14 April 2021. El a mustra cu na 2019, P. a kibra e bentana di cas di mayor di O. y a maltrata O. dilanti su mama. Dia 23 Januari 2019, tabatin otro caso di maltrato di O. Tur e maltratonan aki ta relaciona cu e hecho cu P. ta pensa cu O. tin relacion cu un otro homber.
Fiscal a exigi 3 aña y 6 luna di prison di cual 10 luna ta condicional cu un tempo di prueba di 2 aña. Fiscal tambe a exigi pa prohibi P. di tin contacto cu e dama O.
Awe mainta Hues a dicta sentencia caminda Hues a bisa cu e ta haya legalmente proba tur e acusacionnan contra P. Hues a mustra cu P. a maltrata e dama O. diferente biaha. E caso mas serio tabata esun di 14 April 2021 caminda P. a maltrata e dama O. y despues a viol’e. Hues a bisa cu P. a admiti di a dal O. algun wanta na cabez y mokete na pia, despues di a coy O. su cellular. P. tambe a admiti di a tene relacion sexual cu O. Hues a sigui bisa cu e dama O. a gaña P. cu e ta bolbe cun’e. Asina e dama O. por a bay den su auto te na cas di su ruman muher y sera porta pa P. E ruman muher di O. a sali pafor pa P. cu un palo di golf. Hues a mustra cu e raport di dokter ta mustra cu O. a sufri slanan y tabata hopi afecta.
Pa cu e castigo, Hues a tene cuenta cu P. a viola su ex pareha O. Esey por tin consecuencia psychico pa O. Hues a confirma e exigencia di Fiscal 3 aña y 6 luna di prison di cual 10 luna ta condicional cu un tempo di prueba di 3 aña. Tambe Hues a prohibi P. pa drenta den contacto cu O. y cu P. ta cay bou guia di Reclasering. Hues a aproba e daño material na 2500 florin envez di 5 mil florin. Hues a bisa cu e resto ta wordo declara no admisibel y e dama O. por cuminsa un caso civil. Hues tambe a pone medida di pago contra P.
E acusado P. no tabata contento cu e sentencia y a expresa cu e ta bay apela.