Home Politics MINISTER DI ENSEÑANSA Y DEPORTE ENDY CROES A RICIBI BISHITA Y REUNI...

MINISTER DI ENSEÑANSA Y DEPORTE ENDY CROES A RICIBI BISHITA Y REUNI CU REPRESENTANTENAN DI FIFA

SHARE

ORANJESTAD; Diamars atardi ultimo Minister Endy Croes a ricibi bishita y a reuni cu representantenan di FIFA cu ta na Aruba; FIFA Development Manager – Caribbean region, sr. Marlon Glean y FIFA Development Officer- Caribbean region, sr. Jordan Victoire. Presente tambe na e reunion Presidente di AVB Arubaanse Voetbal Bond, sr. Randolf Lacle y miembro di directiva sr. Hubert Solagnier. 

 

Minister Endy Croes a expresa cu e reunion tabata hopi fructifero unda a trata diferente topico.

Un punto hopi interesante ta cu FIFA tambe ta pone hopi insistencia cu Aruba mester tin un stadion aproba pa hunga su weganan nacional na cas, nos a elabora di e infrastructura di e stadionnan y algun proyectonan hopi bunita pa den futuro.

 

Minister Endy Croes a sigui bisa cu FIFA tin un programa pa yuda tur nan miembronan, di cual Aruba tambe ta un miembro, ta dispuesto pa inverti un capital pa drecha un di e stadionnan na e standard unda cu un di e weganan lo por wordo hunga na Aruba. 

Na luna di juni 2022 Aruba tin un wega di ‘Nations League’ cu Aruba semper a hunga na Merca of Curaçao, si acuerdonan cana manera cu nos ta mirando y por logra firma e acuerdonan prome cu aña caba pa cuminsa  e proceso pa FIFA di su parti  lo por cuminsa saca e fondonan cu e mira pa un di e stadionnan  lo por ta cla pa juni 2022 y Aruba lo por hunga su wega nacional na cas. 

 

Durante e reunion tambe a bin dilanti cu Arubaanse Voetbal Bond na 2022 ta celebra su 90 aña di existencia, pues lo ta bunita, cu ohala cu den luna di juni 2022 nos lo por tin un celebracion y tambe un apertura di un di e dos stadionnan existente ful modernisa. 

Minister Endy Croes a sigui bisa cu tempo ta mustra cortico pero di acuerdo di e experencia di esnan sinta na mesa di FIFA e ta ‘haalbaar’. Ta e boluntad mester tey pa asina hunto nos mira den mes un direccion. ‘Nos mester haci algun papeleo ‘paperwork’ rapidamente prome cu fin di aña’, Minister Endy Croes a expresa.

 

Mi ta comprometi como Minister di Deporte y mi a expresa esaki na e representantenan di FIFA cu mi lo bay convence e ‘stakeholders’ den e veld aki pa nos pone nanishi un rato den mes un direccion y tuma e ayudo di FIFA bou di cierto condicionnan cu tur pais rondo mundo tambe ta practica. Ohala esaki ta un comienso nobo tanto pa e presidente di Arubaanse Voetbal Bond y su directiva y cu e desaroyo nobo cu esaki lo bay crea pa e deporte di futbol. ‘Nos ta contento, por mira atras riba un bon reunion’, e Mandatario a enfatisa y finalisa.