ORANJESTAD – Tur aña mundo henter ta para keto riba e fecha di 20 di november como e fecha declara pa Nacionnan Uni como e Dia internacional di Derecho di Mucha. Pero pakico ta marca dia internacional realmente? Esaki ta crea e oportunidad pa educa e publico cu un audiencia mundial riba topiconan di preocupacion pa asina mobilisa interes politico y recursonan pa adresa problemanan global y celebra y reinforsa e logronan di humanidad. E existencia di dianan internacional a bira un herment poderoso pa conscientisacion riba un escala grandi.
Dia Internacional di Derecho di Mucha a wordo establici na aña 1954 y ta celebra esaki anualmente riba 20 di november pa promove union internacional, conscientisacion di muchanan rond di mundo y asina trata di influencia e bienestar di e muchanan.
Na 1959 den un asamblea general di Nacionnan Uni, lidernan mundial a adopta e Declaracion di Derecho di Mucha. Riba e mesun fecha di 20 di november, pero na aña 1989 a yega na un acuerdo cu globalmente lo salbaguardia e bienestar di tur muchanan pa medio di e Tratado di Derecho di Mucha. E tratado aki ta un di e tratadonan di derecho humano mas ratifica dor di mas pais na mundo. Tin hopi mas atencion pa proteccion di mucha pa nan por desaroya na nan maximo potencial pa medio di e 54 articulonan den e tratado.
E aña aki, e crisis di COVID-19 a resulta den un crisis di derecho di mucha tambe. E consequencianan di e pandemia pa muchanan ta directo, y si no adresa esakinan lo por dura pa bida largo. Nos por tende rond di mundo e impacto riba e salud mental di mucha, e grado di stress cu nan te ainda ta experienciando. Ta keda na adultonan di tur sector pa percura cu e muchanan ta haya e proteccion y sosten cu nan mester. Ta importante pa adultonan den bida di e mucha ta atento na e sentimento di mucha of hoben y demostra comprension pa e tempo dificinan aki.
Mama, tata, maestro, enfermero, dokter, lider político, activistanan, e comunidad religioso, sector priva y media por hunga un papel importante pa haci e Dia Internacional di Mucha relevante den nos sociedad. E fecha aki mester sirbi como punto di inspiracion pa por conscientisa, promove y celebra e derechonan di mucha. Pero tambe pa traduci esakinan den dialogo y accion pa por construi un miho mundo pa nos muchanan.
E ta un compromiso cu mester ta carga dor di tur sector y tur grupo den nos sociedad. Tin hopi maestro di scol cu ta atencion den klas na e derechonan di mucha na scol. Comision Derecho di Mucha kier a duna sosten na e esfuerzo aki dor di pone disponibel handsanitizer, poster y potlood como material. Tur tres e productonan aki ta haci promocion pa e website www.derechodimucha.org, unda cu ton tur información relaciona cu e Tratado internacional aki. Riba e website por haya tambe tur e raportnan cu Aruba a entrega y e recomendacionnan cu nos a ricibi. Pa maestronan cu ricibi e materialnan aki lo por yama Departamento di Asunto Social 528-1100 of mi mes persona na 593-7078.
