For di oranan di mainta un team di recherche tabata riba un bon pista di un grupo di traficado di droga via lama.
Supuestamente nan lo a bay pisca, pero nan lo a bin tera cu algun pisca y hunto cu e pisca un cantidad di droga tambe a yega tera. Danki na e bon trabou di e team di recherche di droga, nan a logra pone man riba riba e droga aki y a detene tres sospechoso.
Autoridad a haci dos entrada hudicial, na un cas den Caya Bohi na Mabon, den Nieuweweg nan a para un van y na un cas den Cayenastraat.
Na e cas den Cayenastraat, autoridad a detene tres persona.
Un di e sospechosonan tabata e homber yama Panama cu un rato prome polis a par’e y a papia cu ne den Nieuweweg. Panama a bay cu su van den Cayenastraat y aki e tabata zundra cu boca grandi bisa cu e ta pisca so e la bay pisca, e la saca su ekiponan di pesca, bisando cu e no tin nada di haber.
Despues di un rato polis a detene Panama como un sospechoso, un persona mas cu tabata den e cas y e chauffeur cu a maneha e Nissan March. Aparentemente e persona aki ta e sospechoso clave, cu probablemente lo a transporta e droga.
Polis den presencia di un persona di Ministerio Publico a a haci un buskeda extenso den e cas y aki a haya un cantidad grandi di droga.
Polis a busca den e autonan y pa busca mas profundo a dicidi di confisca dos auto, esun di e piscado Panama y e Nissan March. Ambos a wordo hiba cu takelwagen pa warda di polis.
Aki por mira con facil droga ta drenta Aruba, via lama, hunto cu pisca. Paso e piscadonan por bay busk’e riba lama y dje trece tera, hopi biaha sin wordo controla pa autoridad, si Warda Costa ta controlando otro parti, e ta bira facil pa nan yega tera cu ne.
