Home Politics Minister Rocco Tjon: DEN CUADRO DI ASUNTONAN SOCIAL A REUNI CU FUNDACION...

Minister Rocco Tjon: DEN CUADRO DI ASUNTONAN SOCIAL A REUNI CU FUNDACION CAS PA COMUNIDAD ARUBANO (FCCA)

SHARE

ORANJESTAD – Diamars atardi a reuni cu e hunta di FCCA, caminda henter gerencia tawata presente. E intencion di e reunion aki tawata pa wak con Ministerio di Husticia y Asuntonan Social por coopera y colabora cu FCCA. Manera ta conoci FCCA tin un rol di suma importancia den diferente barionan, caminda nan tin un colaboracion existente cu entre otro Deprtamentonan di Asuntonan Social pero tambe cu Cuerpo Policial di Aruba.

Segun Minister Tjon, esaki ta un indicacion di e colaboracion existente y a bisa tambe cu FCCA ta un socio logico pa su Ministerio den cuadro di su maneho caminda nan kier inverti den e diferente barionan. E ta importante pa observa con esaki a sosode den pasado, pa asina wak tambe kico pora siña di esey. A base di e informacion aki por deduci cu esaki ta e momento oportuno pa firma un convenio nobo cu pais Aruba. Den cuadro di esaki, lo percura pa haci un estudio di e “best practices” pa esakinan por forma parti di e convenio nobo y asina por tin un miho indicacion di con Ministerio di Husticia y Asuntonan Social lo percura pa e barionan ta mas sigur hunto cu entre otro FCCA como socio strategico.

E Mandatario a sigui splica cu entre e palabracionnan cu a wordo haci cu FCCA, un di nan ta cu Ministerio lo manda nan un documento cu e concepto di con su Ministerio lo kier wak e cooperacion entre nan, pero tambe lo duna un imagen general di con ta wak e inversionnan cu mester tuma lugar den e diferente barionan. Akinan ta papia di e infrastructura general cu ta toca e parti di recreacion, e parti di percura cu e barionan ta limpi, percura cu e trafico ta sigur pa muchanan por hunga riba caya pero tambe ta wak pa stimula e centro di barionan pa bira mas activo. Hunto cu FCCA lo percura pa bin cu diferente programanan pa nos hobennan por haci den oranan di atardi y anochi. FCCA ta conta cu diferente di e vehiculonan aki caba, pues nan tin e manera pa yega na tur e ciudadanonan di e diferente barionan, pa asina percura cu tin programanan cu tin nan interes tambe.

Minister Tjon a termina bisando cu aki dos siman lo bolbe sinta na mesa FCCA pero tambe cu demas Ministernan cu tambe lo kier forma parti di e programa aki, manera entre otro Minister di Enseñansa y Deporte Sr. Endy Croes como tambe Minister di Labor, Integracion y Energia Sr. Glenbert Croes.