ORANJESTAD – Awe Hof a trata e protesta di abogado mr. Carlo di Rudy Carti, contra e decision di Fiscal cu Carti mester a entrega su mes dia 21 di October 2021 na KIA pasobra Fiscal a dicidi cu ta apela e sentencia.
Aruba Native por a compronde cu e decision di Fiscal, tabata net 1 dia promer cu e periodo di apelacion a pasa. Apenas Carti tabatin 12 dia liber, cu e mester a bay entrega su mes na KIA sino Fiscal lo duna orden pa su detencion.
Awe mainta tratamento di e caso a tuma lugar pero tabata cu portanan sera ya cu e tipo di caso asina ta wordo trata “Raadkamer”.
Por a compronde cu mr. Carlo a cuestiona cu ta inhusto cu Fiscal ta ordena pa bolbe detene Carti siendo cu el a wordo laga liber for di KIA. Tambe a abogado a pidi pa suspende e detencion y si tog ta haya cu loke Fiscal a haci ta corecto, pa laga Rudy Carti den libertad te ora cu e caso di apelacion keda trata den Corte Superior.
Hof, despues di a scucha e punto di bista di mr. Carlo y di Fiscal, a bisa cu ta bay studia e caso y cu mas tarda diabierna lo por spera un decision. E siman aki mes lo keda conoci si Carti mester wordo laga liber of e tin cu keda den KIA.
