Home Politics Celebrando 65 aña cantando pa su pueblo… Homenahe na Jossy Brokke, e...

Celebrando 65 aña cantando pa su pueblo… Homenahe na Jossy Brokke, e voz di oro di Aruba

SHARE

Jossy Brokke ta wordo considera como un di e cantante y compositornan Arubano di mas importante, emblematico y legendario di henter nos historia como isla y como pais. Su carera musical a cuminsa na aña 1956 cu su 9 aña di edad den e programa “Buscando talento artisico” di e legendario Sr. Addison Croes, na emisora Voz di Aruba.

Un di e momentonan di mas culminante di su carera tabata 30 di october 1976 caminda e ta bira e prome cantante Arubano cu ta representa Antiyas Hulandes den Festival internacional di OTI, un di e festivalnan musical internacional di mas renombre di tur tempo.
Na su 74 aña di edad actualmente, nos por mira atras riba un carera y trayectoria impresionante di Jossy como cantante, compositor, musico, productor, presentador di television y entrepreneur creativo.
Su logronan, exitonan, premio y reconocementonan ta excepcional y numeroso. El a representa Aruba na varios pais rond di mundo y ta hopi ta e cantantenan cu a interpreta su composicionnan.
Masha poco artista sinembargo tin e privilegio y dicha di por cumpli 65 aña activo den e mundo di entretenimento.

Desde algun siman caba nos por a scucha varios comentario cu lo tin un proyecto hopi special na caminda prome cu 2021 yega su fin. E noticia aki a haci su fanaticonan masha contento y entusiasma.
Riba Jossy Brokke su pagina oficial di Facebook, nos por a mira e confirmacion cu fundacion Go Cultura a tuma e iniciativa y encargo pa organisa: “T’ami ta Jossy”, un homenahe musical na Aruba su voz di oro combina cu un documentario biografico di e bida di Jossy, ya cu e logro historico aki no por pasa bay sin mas.

Loke nos por anticipa ta cu e homenahe musical lo tuma lugar dia 1 di december proximo den Cas di Cultura.
E lo ta un concierto di gala carga pa un elenco impresionante di e streanan di mas briyante di e mundo musical di nos pais cu na mes momento ta amigonan di semper di Jossy. Hunto cune, nan lo presenta su exitonan musical y celebra hunto cu Jossy Brokke, 65 aña magnifico di musica, inspiracion y alegria.

Entrada pa e anochi magnifico aki ya ta obtenibel a traves di email: info@gocultura.org of via Whatsapp: +297 569 5442.
Entrada ta limita considerando tur e regla y protocolnan di DVG cu ainda ta vigente. Pues nos ta recomenda bo pa reserva bo carchi awe mes pa bo no keda afor.
Keda pendiente pa mas detaye di e proyecto: “T’ami ta Jossy – Homenahe na e voz di oro, celebrando 65 aña cantando pa su pueblo” den Cas di Cultura dia 1 di december proximo.