Oranjestad – Diaranson atardi, Aruba Bank a patrocina un sesion informativo na su sucursal na Camacuri titula “Platformification”. E presentacion a wordo haci den cuadro di Futura Lab Aruba su di dos edicion di IMMERSE.
Tumando den consideracion cu e enfoke di e aña aki ta pa stimula e capacidad y conocemiento di innovacion cu tin den e comunidad Arubano den diferente tipo di industria, representantenan di e Departamento di Innovacion y Tecnologia di Aruba Bank, Nigel Wix y Marlon Kock, a dirigi e sesion y e presentacion.
Pa Aruba Bank ta importante pa trece padilanti con e industria bancario por construi un ecosistema basa ariba plataforma nan cu ta draai rond di e necesidadnan di e ciclo di bida di un cliente y alabes ta ofrece productonan necesario pa realisa esaki. E ecosistema aki lo promove innovacion mas liher posibel danki na un infrastructura cu ta hopi flexibel y esaki ta permiti un integracion mas rapido di tecnologianan y “business partners” paden y pafor di e industria financiero/bancario.
E sesion a conta cu un bon acohida na e Canteen di Aruba Bank. Pa Aruba Bank ta un placer pa contribui cu nos partner, Futura Lab Aruba, pa sigui stimula e conocemento di e area di innovacion y tecnologia den e area financiero.
