Siman pasa a sali cu airambulance pa Colombia, e conocido presentado Jacky Wernet, pa sigui ricibi tratamento medico mas specialisa despues di tabata hospitalisa den cuido intensivo na dr Horacio Oduber Hospital.
Mike Eman lider di partido AVP a dirigi un mensahe riba rednan social pa un recuperacion di tanto Jacky Wernet como tur otro persona cu ta na Colombia pa tratamento medido y tambe pa tur interna aki na Aruba, luchando contra di un of otro enfermedad serio.
“Cu gran solidaridad y oracion, nos ta bira e momentonan dificil aki cu Jacky Wernet y su famia, suplicando cu por supera e situacionnan delicado di su salud.
Un amistad y confiansa cordial nos ta comparti cu Jacky como ex coleganan di trabou pero tambe como coleganan den e lucha contra di e mesun tratamento canceroso cu nos tambe a biba algun tempo atras.
Ta momentonan cu reto grandi su dilanti cu Jacky ta confrontando y nos oracion lo ta tur dia cu su recuperacion total, ya cu bo a logra e superacion aki caba den bo bida y nos ta sigur cu lo bo logra atrobe.
Nos profundo sentimento di solidarismo y sosten moral pero mas tanto den nos oracion na Dios, nos lo sigui compaña Jacky y tur otro hende pa nan recuperacion total,” Mike Eman lider di AVP a declara.