Despues cu Partido Patriotico di Aruba (PPA) a dirigi un carta na Conseho Electoral di Aruba referente e obligacion di tur partido pa raporta fuentenan di nan fondo di campaña, PPA a dirigi carta na Minister President cu copia pa Presidente di Parlamento tocante e inkietud di e proceso di screening y nombracion di Gabinete Wever-Croes II:
Carta dirigi na Minister di Asuntonan General/Formado di Gobierno:
PPA a solicita informacion basa riba e “Landverordening houdende regels inzake openbaarheid van bestuur – LOB) ariba:
1) Documentonan di e proceso di screening di e candidatonan di Minister di Gabinete Wever-Croes II
2) Gastonan den presupuesto pa e di 8 Minister di e Gabinete.
Manera PPA a menciona, basa riba e stimulacion di integridad y transpariencia, ta bon pa trece claridad riba tur e inkietudnan cu ta biba den nos comunidad y pone esakinan na luz pa asina por sigui padilanti.
Aunke Minister President ta suheto na obligacion di privacidad pa ley, un opcion lo ta pa cada Minister pone nan informacion disponibel boluntariamente.
PPA ta sinti den comunidad, promesanan pa cambio haci durante campaña electoral a keda cortico, referiendo na e Gabinete di 8 Minister, y nos ta kere cu Gobierno mester duna e ehemplo den momentonan di austeridad y reduccion di gasto. Maneha e Pais cu menos Minister y laga hefenan di departamentonan haci nan trabou manera PPA a boga p’e durante su campaña.
PPA ta spera cu Minister President/Asuntonan General lo duna oido na e peticion aki y sinceramente trece un discusion habri y transparente tocante e proceso di screening y nombracion di 8 Minister. Nos ta recorda Minister President cu e mes a yega di expresa cu su Gabinete lo ta forma di 7 Minister. Kico a pon’e cambia di opinion?
Carta dirigi na Presidente di Parlamento di Aruba:
Den e carta aki, PPA ta felicita Presidente di Parlamento y Parlamentarionan cu e periodo nobo nan dilanti. Tambe PPA ta resalta e responsabilidad di Parlamento como organo mas halto di Aruba ariba nan obligacion di salbaguardia bienestar di nos Isla na prome luga. No permiti un “stempel parlament” promulga cambionan den nos sistema electoral y cambio di leynan anticua cu ta stroba desaroyo di nos Pais.
Partido Patriotico di Aruba – P.P.A.
Tel: +297 569 6884
1
E-mail: [email protected]
Na mes momento a pone Presidente di Parlamento na altura di e solicitud na Minister di Asuntonan General/Formado di Gabinete Wever-Croes II pa informacion di e screening di candidatonan pa Minister y riba gastonan real di mantene 8 Minister.
PPA ta di opinion cu Gobierno tin e obligacion pa reduci gastonan di Gobernacion y mester cuminsa den cas, tambe considerando e peso di algun Ministerio compara cu otro, entre otro e Super Ministerio di Prome Minister, versus esun di e partner di coalicion.
PPA a sigui e reunion di Parlamento tocante e topico aki, y ta lamenta cu e tratamento a bay na un nivel hopi abou y cu falta di madures politico. E pregunta principal mes no a haya contesta.
PPA ta spera cu lo duna oido na e peticionnan haci, tanto na Prome Minister, como na Presidente di Parlamento.
PPA lo sigui traha, formando un organisacion politico serio, organisando un ‘Think Tank’ cu expertonan riba varios tema, segun nos plan di gobernacion presenta den nos programa politico. Tambe nos sistema di social media y website ta keda activo y nos lo publica ora nos tin un contribucion positivo pa haci of nos ta ripara cu nos gobernantenan ta fayando di cumpli nan promesa di campaña.
Si acaso Bo ta desea di comparti cu nos, uni na e causa di Transformacion, of yuda nos organisa y desaroya nos plataforma politico, subi ariba nos website of contact nos via Facebook.
