Home Politics Segun Booshi Wever: MACHIAVELLI TA KEDA CHIKITO

Segun Booshi Wever: MACHIAVELLI TA KEDA CHIKITO

SHARE

 

 

Normalmente sa duna un gobierno nobo cu sinta 100 dia pa asina mira kico e tin den tapara pa e proximo 4 aña riba nivel di gobernacion di un pais. Hopi biaha ta wordo spera cu den e prome 100 dianan e base di e gobernacion ta wordo poni pa asina cumpli cu loke a bin ta wordo priminti p.e. durante campaña.

 

E idea di e prome 100 dianan ta un manera pa evalua un gobernacion, y esaki a cuminsa na 1933 tempo di Presidente Franklin D. Roosevelt. E tempo ey Merca y mundo completo tabata den un crisis y a bin cu e New Deal cu mester a percura pa pone e wiel di economia Mericano y consecuente esun mundial cuminsa draai. Asina tambe a bin e aspecto di e prome 100 dianan unda ta duna gobernacion un chens y asina evalua e logronan. Ta trata aki mas bien di un tradicion no skirbi, pero den tempo di crisis dificilmente nos por sinta warda e 100 dianan aki pasa.

 

Loke si nos por bisa cu desde cu eleccion a tuma lugar dia 25 di juni, a tarda mas di 80 dia pa un gobierno nobo sinta, mientras cu riba dia dia eleccion anochi Prome Minister a sali bisa cu no tin tempo pa perde mirando e situacion grave cu nos pais ta aden y cu mester bin un gobierno mas rapido posibel. Desde maart 2021 sinembargo nos tabata tin un gobierno demisionario cu a tuma hopi decisionnan hasta den e 80 dianan di formacion cu no ta na bienestar di nos pueblo y cu lo por tin su consecuencianan cu nos no ta desea pa nos pais. Cu instalacion di Gabinete Wever-Croes II, tabata bisto cu loke ta conta ta loke cu gobierno Hulandes kier impone riba nos, via e.o. CAft y tambe combenio y palabracionnan haci.

 

Sinembargo loke nos ta constata ta e hecho cu e gobierno actual de facto ta un continuacion di e gobierno anterior. E prome ministro actual segunda y apoya pa por lo menos 2 integrante di e conseho di ministro actual ta100% na altura di tur e clesticknan cu lo bai wordo propina den stoma di nos pueblo! Cada uno tabata sa di esakinan prome cu eleccion pero a scohe pa keda keto. Tipo di accionnan asina NO ta INTEGRO. Esakinan mas bien ta actonan MACHIAVELICO!

 

Den e siguiente dianan nos lo bai mas den detaye di e medidanan Machiavelico cu lo ser tuma, e.o. den AZV, dolarizacion, edad di pension, cambionan den LMA, tornomento na nos sistema fiscal etc etc. E biaha aki mi lo toca e temanan di cambionan den nos leynan laboral y den nos LTU. Manera ya ta conoci ribaBlack Friday 13 di november 2020, e Prome Minister di Aruba a pasa e pueblo Arubano un puñal den su lomba na unda ela firma un acuerdo traicionero y strangulante cu Hulanda. E fin di siman cu a pasa mi a haya e documentonan cu gobierno di Aruba proximamente (prome cu 15 di november 2021) lo mester simpelmente “teken bij het kruisje”! Tur esaki a base di e acuerdo traicionero y strangulante a consequencia di e acuerdo ariba menciona. (Machiavelico)

 

Den e acuerdo aki tin masha hopi asuntonan firma cu lo nifica un sufrimento pa nos pueblo pa motibo di e gobernacionnan desastroso desde fin di 2009. Nos lo bai mustra den e siguiente dianan e puñalnan di e gobierno POREDMEP y awor cu apoyo incondicional y 100% den e gobierno actual.

 

Esaki ta e prome 2 traicionnan!

 

* E fenomeno di Hire & Fire lo drenta na vigor! Kiko esaki lo nifica pa e homber chikito?

 

Esaki kiermeen cu lo bai tuma hende riba ” 0 (nul) uren contract”. Pues asina bo no por bai niun banco pa nada y e doño di trabow por kita bo na su antoho! Mas abuso contra e pueblo trahador. Esaki lo nifica tambe cu e proteccion cu e clase trahador tabata tin lo cai afo. Esaki lo nifica cu e homber humilde lo bira mas pober (“low class) y e rico lo bira mas rico(“elite group”)!

 

* Flexibilizacion di nos LTU. Ya caba Caft a laga sa cu esaki kiermeen cu mester laga 28.000 contribuyente drenta! Esaki den cuadro di e “gezinsherening” cu ta ancla den e tratado di “family-life”! Esaki lo nifica cu por lo menos 75.000 alma extra riba nos pida baranca di 180km2! Pues nos pais lo bira GIGA sobrecarga! Esey lo sigi explota más ilegal y e Arubiano lo keda sin trabow! Y e pueblo humilde ta esun cu proximamente lo mester acepta cu lo bai torno na su derechonan den AZV, nos yuinan lo mester bai den klasnan di 40 alumno etc etc.

 

Den e plan total lo bin un tornomento formal den e pakete existente di AZV y lo bin e asina yama “eigen bijdrage ” cu gobierno a sapatea y nenga redondamente prome cu eleccion! Y awor ta bai firma “bij het kruisje” djis pa bolbe haya e “geldbuidel” enbez di e “kraaltjes en spiegeltjes ” di antes. Esaki ta djis e top di e ijsberg di e sufrimento pa nos pueblo. Proximamente nos lo publica mas di bochornonan aki, tur a consequencia di e traicion di nos Prome Minister actual y pa colmo apoya pa full conseho di ministro y un mayoria den Parlamento!

 

Ay, mi Aruba,ki dia e sufrimento aki ta caba?

 

Miembro di Partido UPP

Booshi Wever

11 oktober 2021