Home Local Tayer /Workshop “Desaroyo Continuo & Digital 60+ “ un exito mas di...

Tayer /Workshop “Desaroyo Continuo & Digital 60+ “ un exito mas di proyecto Hunto Grandi Grandi Hunto di FMTB Pero necesidad grandi ta keda

SHARE

Fundacion Movimiento Ta Bida (FMTB) pa medio di su proyecto Hunto Grandi Grandi Hunto
(HGGH) a tene un encuesta na juli 2020 pa haya sa cua ta e necesidadnan of e deseonan di
personanan ariba 60.

Informacion y formacion ariba tereno digital ta un deseo grandi cu encuestadonan a menciona,
un deseo sigur hopi comprendibel. Nos mester pensa un rato cu e prome IBM computer
personal a bin na 1983. Tempo cu personanan cu a nace na 1960 ( of prome) ya tabatin e edad
di 23 of mas. Ya nan a caba nan scolnan caba aki na Aruba. Pues nan no por a goza di e
formacion of informacion basico digital, cu nos muchanan si tin awendia.

Considerando y comprendiendo e necesidad grandi aki, coordinadora di e proyecto HGGH,
coordinadora a traha un propuesta pa un programa unda por capacita nos grandinan den e
desaroyo digital. Sra. Rosa Leon y presidente di FMTB Sr.Rudy Leysner a acerca SETAR pa
intercambia di idea y un posibel cooperacion. Por bisa cu desde prome combersacion
representante di SETAR Sra. Kimberley Boekhoudt a mira importancia di e proyecto aki. Den un
presentacion di e proyecto pa Setar unda tambe tawata presente tambe mentornan Stella
Geerman, Ingrid Dubero y Lupita Gil, Setar a para 100% tras di e Proyecto.

Pa 3 luna (2 bes pa siman) Kimberley a ofrece un tayer na 28 persona cu tawata miembronan di
diferente gruponan social di hende grandi. E personanan aki nan nan turno a comparti e
informacion basico den barionan na diferente lidernan di gruponan 60+ den durante luna di
februari di e aña aki den forma di tayernan den e barionan Savaneta, Santa Cruz, Bubali, Playa y
Dakota Na final di e tayernan a organisa un dia informativo pa tur cursista na Cas di Cultura.
Diferente banco, compania, instancia y negoshi tabata presente pa presenta sea nan app, nan
manera di paga digital y otro informacion balioso pa nos grandinan.

Recien a realisa e di 3 fase di e proyecto pa 2021. E biaha aki a ofrece e tayer di 4 siman na
interesadonan den luna di September den e barionan, San Nicolas, Paradera, Noord, Dakota,
Playa y na Cas di OPPA. Por bisa cu manera a publica e tayernan, nan a yena mesora. Tur
persona cu a atende e tayer, a keda felis y a expresa e deseo na mas info. E informacion di
compania y instancianan e biaha aki lo ta parti den diferente charlanan cu lo wordo teni na
Centro di Bario Playa Pabao. Motibo ta cu october ta luna di adulto mayor y Proyecto Hunto
Grandi Grandi Hunto ta desea di duna e informacion aki na mas hende den un otro forma tambe.

Coordinadora di e proyecto HGGH Sra. Rosa Leon y presidente di FMTB Sr.Rudy Leysner a evalua
e proyecto “Desaroyo continuo & Digital 60+ hunto cu representante di SETAR Sra. Juliska
Henriquez y e guiadornan di e tayernan. Por bisa cu a alcansa mas cu 300 persona cu a
participa den e tayernan aki. Pero sigur ta cu e necesidad grandi ainda t’ey y SETAR ta dispuesto
pa sigui yuda na e formacion aki. Un prueba ta e peticionnan cu ta keda drenta!

Minister President E. Wever Croes y Minister U. Arends encarga cu Asuntonan di Adultonan
Mayor, a garantiza e sosten na Aruba su Grandinan. FMTB & Proyecto HGGH cu satisfaccion ta
mira bek ariba e ultimo desaroyonan y tin tur confiansa cu e atencion sincero di parti di
Gobierno, comercio y tur instancianan pa nos 60plus a yega!

FMTB ta gradici Setar, Cede Aruba, centronan di bario cu a coopera y tur otro instancia y of
organisacion, tambe instructornan di e tayernan cu a yuda e Proyecto aki bira un exito rotundo.