Despues di a finalisá 4 di 6 ekspedishonnan sientífiko, Caribbean Cetacean Society (CCS) a studia visual- i akústikamente mas ku 2.950 mamífero marino di dies diferente sorto entre e islanan di Anguilla i Martinique. Esaki tabata parti di e proyekto “Ti Whale an Nou 2021 ” (Nos bayenanan chikitu). A graba mas ku 600 ora di zonidu bio-akústiko di frekuensia haltu. Esaki a tuma lugá den 50 dia riba trayektonan di mas ku 4000 kilometer total.
E NGO aki ku a keda resientemente fundá pa biólogonan marino karibense di Martinique, ku ta atendé ku protekshon di nan teritorio, ta mustra resultadonan prometedor durante e promé aña di investigashon. Dor di hasi investigashonnan durante dos luna konsekutivo na 13 isla karibense, CCS a kolekshoná informashon tokante mamífero marino den hinter Karibe. E organisashon Karibense aki a posishoná su mes kaba komo e kordinadó adekuá pa promové e kolaborashon entre e diferente islanan ku e meta pa yuda mehorá konservashon di espesienan ku no konosé frontera.
E promé 4 ekspedishonnan aki a hasi posibel pa graba e orka (Orcinus orca) visual- i akústikamente pa promé biaha na Antiyas. Espesienan eksepshonal manera e orka pigmeo (Feresa attenuata) a ser mirá pa promé biaha den e sanktuario protehá ‘Yarari Marine Mamma land Shark Sanctuary’ ku ta konsistí di e lamannan di Boneiru, Statia i Saba. E estudio tokante 18 famia di e sperm whale (“Physeter macrocephalus”) ta indiká ku e mesun gruponan ta ser dividí entre e sanktuarionan di naturalesa Yarari di e islanan BES i Agoa Sanctuary di e islanan fransés. Pa e motibu aki koperashon ta e yabi prinsipal pa por protehá mamífero marino. Esaki ta un di e puntonan esensial di CCS.
Aparte di kolekshoná datonan sientífiko, e inisiativa Karibense aki a brinda un eksperiensia balioso na mas di 20 partisipante ku ta aktivo den e investigashon di mamífero marino den e region mas amplio di Karibe. Durante e ekspedishonnan aki, partisipantenan lokal a haña entrenamentu i a logra haña abilidatnan riba tereno di e tópiko aki ku ta poko konosí. E meta ta pa engrandesé e konosementu di mamífero marino den nan teritorio.
Pa kada ekspedishon ta bai un tim di 6 persona riba un boto en buska di bayena ku dòlfein. Un sistema hidrofóniko ta hasi posibel ku por skucha durante dia i anochi kua espesie di mamífero marino ta serka di e boto. Inspekshon visual ku ta tuma lugá konstantemente for riba e boto ta yuda señalá e animalnan ku ta na superfisie di awa. Ora nan yega sufisientemente serka di e boto, e ekipo ta kolektá informashon for di e rabu di e sperm whale a base di portrèt i telefoto. Pa medio di e forma di rabu, e sperm whale ta ser identifiká, meskos ku nos ta hasi ku fingerprint. Pa medio di e informashon aki por identifiká famianan i movishonnan di tur e tiponan di bayena na Antiyas.
Tur isla Karibense ta dependé di e ekosistema marino pa loke ta trata kuminda i entrada, pues ta importante pa protehá esaki. E grupo di famia bayena ta un espesie vital pa hende. Poko hende ta konsiente ku anualmente e bayenanan grandi ta risibí 4 biaha mas tantu dióksido di karbon i ta produsí 4 biaha mas tantu oksígeno ku e gran selvanan di Amazonas. Por ehèmpel, e sperm whale ta e animal feros mas grandi na mundu. E ta biba den famia, tin kultura i ta papia diferente idioma den grupo. Pèrdida di e espesie aki por ta desastroso pa bida marino manera nos konosé.
E sobrá di e ekspedishonnan lo bai desvelá sin duda otro resultadonan fasinante di nos herensia natural ku no ta hopi konosí.
Nètwerk i partnernan
E ekspedishon aki ta e resultado di e kolaborashon den e nètwerk Karibense, loke ta parse di ta e mihó solushon pa protekshon di espesienan migratorio ku nos ta kompartí. Esaki a ser realisá pa medio di partisipashon di partnernan públiko i privá: Corail Caraibes, World Wildlife Fund for Nature – Netherlands, EDF Group Foundation, Orange Foundation, SARA, DCNA i AWI.
