ORANJESTAD – Diaranson atardi Minister di Turismo a reuni cu e gerencia y CEO di ATA. Manera ta conoci aña 2020 y 2021 tabata aña nan hopi duro pa e turismo di pais Aruba. Esaki a haci cu ATA mester a cambia starategia y hasta uza fondonan di emergencia pa mercadia pais Aruba. Den e reunion aki ATA a presenta locual nan a haci den mercadeo y tambe nan plan y retonan pa cu e mercadeo di nos turismo pa aña 2022.
Minister Dangui Oduber a duna di conoce cu ATA a selecta un agencia nobo di mercadeo na aña 2020 pa reforza e strategia cu ta desplega den e area di Norte America, esaki a sosode despues di un proceso rigoroso. E evaluacionannan aki cu ta keda haci riba e diferente agencianan di meradeo y/of promocion ta tuma lugar periodicamente. Esaki ta pa sigura cu tur e agencianan cu ta traha pa Aruba y tambe e ekipo di ATA mes keda skerpi, asina e mandatario a trece dilanti. ATA ta keda perura y supervisa cu e agencianan ta cumpli cu strategianan stipula pa cada mercado internationalmente. Pa di e manera aki e vision di pais Aruba keda alinea y asina atrae e turistanan cu nos ta desea.
Actualmente Aruba ta trahando cu e compania “Engine” pa cu e mercadeo Norte Americano, ta trahando cu e compania aki desde aña pasa. Minister Dangui Oduber a menciona cu ATA ta satisfecho cu e resultadonan desplega te cu awor pa “Engine” mey mey di un pandemia. Mirando e retonan nobo di ATA tog a dicidi di cuminsa e proceso pa cambia pa un otro agencia, un agencia cu por pusha e demanda pa Aruba aun mas den e situacion fuerte.
Recientemente ATA a inincia un trayecto di investigacion profundo, e proceso aki ta pa sigura cu Aruba ta keda lidera den turismo. E investigacion aki ta parti integral di e strategia pa cu e plan di mercadeo di aña 2022. Den e plan aki lo bay evalua tur e mecadonan di Aruba pa mira kiko ta e punto di benta di cada un di nan. Di e manera aki captura e atencion debidamente di nos cliente teniendo bon cuenta cu e necesidad y deseonan di e consumidor cu nos kier atrae.
Minister Dangui Oduber a trece dilanti cu ATA semper a tuma desicionnan cardinal a base di datos y investigacion haci. E desicionnan y strategianan di ATA semper tabata den consulta cu e Minister y e hunta di supervicion di ATA, di e manera aki tur ta riba mesun liña. Den aña 2022 ATA lo bay concentra aun mas riba e perfil di bishitante di “High Value”. Esaki ta referi na e turista cu ta laga mas placa atras den nos economia. Tambe lo bay enfoca riba e perfil di “High Value Low Impact Tourism”, esaki nan ta e turistanan cu ta gasta hopi y respeta nos naturalesa y balornan cultural. Minister Dangui Oduber ta sostene e vision aki, e ehercisio aki no lo ta facil pero sigur e lo ta necesario segun e mandatario.
Pa realisa e vision aki caminda gran mayoria di nos bishitante ta respeta locual ta importante pa nos. pa realisa e importancia aki, no solamente mester enfoca localmente riba educa esnan cu ta provee servicio y bishita, pero tambe den atrae esnan cu afinidad pa nos producto turistico, pero tambe cu balor pa locual ta importante pa nos desaroyo duradero.
Minister Dangui Oduber a duna di conoce cu e investigacionnan haci pa ATA lo finalisa na oktober di e aña aki y lo incorpora e resultadonan di e strategia di comunicacion pa 2022 (esaki ta e punto di benta di cada mercado turistico).
