Home Politics Minister Andin Bikker na ocasión di 9/11: We will never forget!

Minister Andin Bikker na ocasión di 9/11: We will never forget!

SHARE

Algun Mericano residencia na Aruba a uni hunto cu Gobierno pa organisa un ceremonia cortico na e kazerne di Cuerpo di Bombero na Tanki Flip, den presencia di Minister Preisdente mr. Evelyn Wever-Croes, Minister saliente di Husticia, Siguridad y Integracion, mr. Andin Bikker y varios otro hefenan di departamento. Di e forma aki Gobierno di Aruba a demostra respet y convivencia di e comunidad Mericano, relaciona cu e atakenan cu a sosode 20 aña pasa riba e fecha ey, caminda cu militantenan terorista a secuestra cuater avion comercial y dirigi nan pa dal den edificionan prominente di Merca. 

 

Dos avion a bay dal den e edificionan di World Trade Center na New York y uno den Pentagon na Virginia. E di cuatro avion cu tabata destina pa bay dal den otro edificio na Washington D.C. a cay na Pennsylvania, ora cu e pasaheronan heroicamente a frustra e intencion di e teroristanan. Un total di 2977 persona a fayece den e atakenan aki, di cual 340 bombero y 72 polis of cuerponan arma di Merca. E atakenan a haci mundo mas pendiente y cu wowonan hancho habri contra terorismo. 

 

Reino Hulandes y Merca

E relacion di Aruba y Merca no ta data di ayera, sino di hopi aña pasa. De facto, e relacion di Reino Hulandes y Merca ta cuminsa for di tempo cu a establece e cuidad cu awe yama New York, cual antes tabata New Amsterdam. E inicio di New York Stock Exchange por ehempel ta data di un systema cu companianan Hulandes a start cu ne. Aruba, siendo parti di Reino Hulandes, semper a gosa di un bon relacion y hermandad cu Merca. Cu masha orguyo por menciona cu Aruba ta un di e poco paisnan den Caribe cu ta conta cu presencia di Migracion y Duana Mericano pa ofrece e servicio di U.S. Pre-clearance. Separa di esaki, tanto na Aruba mes pero tambe na Corsou, tin presencia di “Forward Operating Locations”, conoci popularmente como FOL, cu ta detecta y monitor trafico ilicito den e area. Ta trata aki di un acuerdo bilateral entre Merca, Reino Hulandes y Aruba. Ta un operación grandi di riba 10 militar Mericano, banda di 61 ciudadado Mericano y 52 Hulandes ta trahando activamente cu e servicio aki na e dos islanan.

 

Estrechando mas relacion cu Merca

Es mas, recientemente Minister Andin Bikker a firma un acuerdo cu United States Customs and Border Protection (U.S. C.B.P.) pa estrecha e relacion mas ainda, den cual e autoridadnan local y esunnan Mericano lo traha mas uni na frontera. Na final, Minister Andin Bikker kier logra pa nos isla ta mas sigur y evita cu personanan cu menos bon intencion, manera teroristanan, lo por yega aki. Y si nos wanta nos stupinan limpi, di mes ta evita cu personanan cu menos bon intencion lo por bay purba yega Merca of otro lugarnan for di nos isla.

 

Aruba por ta orguyoso

E hecho cu nos ta conta cu e servicio di Migracion y Duana Mericano na Aruba no ta pa suerte. Ta hopi aña a percura pa negocia te pa yega na esaki. Ta bon pa informa cu ti 600 oficial di Merca trahando den facilidadnan di US CBP na 16 locacion diferente den 6 pais so!. Ta trata aki di e aeropuertonan na Dublin y Shannon na Iranda; na Aruba, na Freeport y Nassau na Bahamas; na Bermuda, na Abu Dhabi, na United Arab Emirates; na Calgary, Toronto, Edmonton, Halifax, Montreal, Ottawa, Vancouver, Victoria, y Winnipeg na Canada. Na aña 2019, US CBP a procesa no menos di 22 miyon pasahero, cu ta representa 16% di tur pasahero cu a biaha pa Merca e aña ey!

 

Uni nos lo vence

Minister Andin Bikker durante su discurso a elabora riba tur e esfuersonan cu Aruba y Merca a haci pa cuida nos fronteranan y sigura cu nos ta miho prepara cu e teroristanan. Locual a cambia desde 9/11 ta cu a opta pa duna servicionan di inteligencia mucho mas autoridad, pa nan por detecta intencionnan y plannan terorista prome cu ehecuta nan. E maneho mester ta pa evita e atakenan en bes di persigui y investiga e teroristanan despues cu nan a comete e atake caba. Asina por ehempel na Merca a crea Department of Homeland Security, cu den forma permanente ta investiga movecionnan misterioso y sospechoso cu por bira un menasa pa comunidad. Na Aruba tambe a cambia maneho pa hunto cu Merca, nos tambe haci tur esfuerso pa coopera y evita actividadnan sospechoso. Pa esaki a cambia varios ley pa por duna autoridadnan local mas espacio pa por investiga y monitor cuentanan di banco y transaccionnan misterioso. 

 

Aruba ta comprometi pa sigui yuda

“We will never forget”, asina Minister Andin Bikker a expresa na tur presente durante e ceremonia “9/11 Twenty Years Memorial Ceremony” di diasabra ultimo. E mandatario a subraya cu su sucesor, hunto cu Minister-President sin duda lo continua cu e esfuersonan pa sigui estrecha e bon relacion entre autoridadnan Mericano y di Aruba. 

 

E minister saliente a gradici tur e Mericanonan presente pa nan amor special pa nos isla y a garantisa nan cu e sentimiento ta mutuo. Separa di e politiconan, tambe a hiba palabra pastoor Gilbert Martes, Rabbi Daniel Kripper, William Whynot, cu tabata un exhefe di Cuerpo di Bombero na Auburn, Massachusetts, Dr. Clifford Faldman, un exboluntario di Cuerpo di Bombero na Merca durante 45 aña, Ronella Croes di ATA y Yuri Nicolaas di Servicio di Inteligencia di Gobierno di Aruba.