Home Politics Sra. Evelyn Wever-Croes, 10 aña pasa a ser eligi como lider di...

Sra. Evelyn Wever-Croes, 10 aña pasa a ser eligi como lider di MEP

SHARE

Diasabra 28 di augustus ta recorda cu 10 aña pasa den un Congreso extra-ordinario na Westin Hotel partido MEP a eligi su lider nobo, esta sra. Evelyn Wever-Croes. Riba e dia aki tabata tin 3 candidato cu a postula pa eleccion di lider y den un forma democratico cu semper a caracterisa partido MEP, sra. Wever-Croes a logra haya e gran mayoria di voto di e lidernan di bario pa ocupa e funcion di lider di MEP. Esaki tabata pa prome biaha cu MEP desde su fundacion a conoce un lider femenino y sin duda esaki a ser acepta cu tur honor den nos partido. Na 2015 sra. Wever-Croes pa aclamacion a ser reeligi como lider den un Congreso di partido.

 

Votegetter di Aruba

Sra. Evelyn Wever-Croes a haci su debut riba lista di MEP na e eleccion di september 2009 caminda el a ricibi 1621 voto. Den e siguiente eleccionnan na september 2013 nos lider a sa di redobla su cantidad di votonan y a ricibi 3396 voto. Na september 2017 sra. Wever-Croes a ricibi 3503 voto y den e eleccion ultimo dia 25 juni 2021 nos lider a logra un record di 7518 voto y pa cual el a converti su mes den e prome votegetter femenino di pais Aruba. Algo cu nos partido ta sumamente orguyoso di dje.

 

E prome Prome Minister femenino 

Dia 17 november 2017 nos lider a huramenta como e prome Minister Presidente femenino di pais Aruba y a lidera e coalicion Gabinete Wever Croes. Actualmente como formador sra. Wever Croes ta den proceso pa forma e proximo Gabinete Wever Croes 2.  

 

Sin duda cu sra. Evelyn Wever-Croes durante e ultimo 10 añanan a haci un tremendo trabao como lider di MEP. Tambe su trabaonan excelente den gobierno durante e periodo di e pandemia a resalta y pa cual el a haya recientemente un distincion como Doctor in Medicine Honoris Causa di Xavier University School of Medicine.

 

Su sinceridad, honestidad, integridad y capacidad ta virtudnan importante y ta muestra di e confiansa incondicional cu henter partido y comunidad tin den su persona.

Pabien, lider Evelyn cu bo 10 añanan como lider di MEP y danki pa bo liderazgo pa mantene MEP como un partido grandi, solido y uni durante e 50 añanan di existencia di nos partido. Sigui cu bo bunita trabao na bienestar di nos comunidad y hopi mas exito.