Home Politics Minister Andin Bikker a otorga certificado y reconocimento na miembronan di Cuerpo...

Minister Andin Bikker a otorga certificado y reconocimento na miembronan di Cuerpo di Bombero

SHARE

 

 

Minister Andin Bikker a otorga certificado y reconocimento na miembronan di Cuerpo di Bombero. Ta trata aki di 22 bombero cu a haya nan diploma di Brandweerkorps Manschap A y B. Tambe 11 adspirant cu a wordo tuma den servicio a ricibi nan diploma A. Di otro banda tin un grupo preparando pa start e curso di “vakmanschap C”. 

 

Ademas a probecha e ceremonia special pa reconoce algun hubilario cu a recorda cu 25, 30 y 40 aña di servicio fiel den Cuerpo di Bombero. Hasta a reconoce Sr. Willem Boezem cu a cumpli no menos cu 41 aña di servico. E tabata traha den centrale post na post Tango na Tanki Flip. 

 

Durante su discurso e mandatario a recorda e hecho cu e siman aki a firma pa cumpra un brandspuit nobo, a haci entrega recientemente di ekipo sofistica di oxigeno y camara Infrared, y cu a encamina e proceso hunto cu DOW pa pronto lo por bay cuminsa renoba e post di Brandweer na San Nicolaas. Tambe a recorda e intencion pa traha un post nobo pa districto di Santa Cruz. E mandatario a gradici e bomberonan pa e pasenshi, debi cu pandemia a percura pa basta retraso. A reconoce e Management Team cu a percura pa a formalisa y keda cla y/of encamina varios proyectonan cu tabata pendiente. 

 

Cuerpo di Bombero Aruba ta existi desde aña 1976, como un departamento independiente. Prome cu esey e tabata parti di e trabounan di Polis. Awendia e ta conta cu como 140 empleado, di cual e mayoria ta traha activamente den combatimento di candela y trabounan di rescate. E empleadonan ta parti den 3 diferente post, situa na San Nicolas, na Aeropuerto y na Tanki Flip. Pa aña nan ta responde na mas o menos 1600 melding, cu ta varia entre combatimento di candela, rescate, yudansa special y trabounan na aeropuerto.