Home Politics Segun Wendrick Cicilia di AVP: “Gobierno su tarea ta pa asisti y...

Segun Wendrick Cicilia di AVP: “Gobierno su tarea ta pa asisti y crea condicionan necesario pa nos ciudadanonan por realisa nan ambicionan y aspiracionan”

SHARE

Organo pa reforma y desaroyo (COHO), medida di austeridad y norma caribense.

 

Comunidad den su totalidad ta pendiente pa e ultimo desaroyo relaciona cu e entidad hulandes cual lo percura pa implementa y supervisa cu e reformanan y medidanan proponi wordo ehecuta y implementa. Un punto di discusion politico cu a genera atencion durante proceso di campaña politico anterior. Durante un encuentro publico nos por a conclui cu e proceso di negociacion relaciona cu e concepto di ley di consenso cual lo introduci un entidad hulandes pa reforma y desaroyo a termina. Gobierno Hulandes y gobierno di Aruba despues di negociacion a yega na un acuerdo pa cu e concepto di ley. Durante e ultimo encuentro publico, Minister-President demisionario a anuncia algun adaptacion di e concepto di ley anterior. Manera lider di fraccion di partido AVP a indica ta trata di adaptacion cosmetico cu no ta cambia e esencia di e concepto anterior. Realidad ta cu e concepto ta impugna cu nos autonomia y ta garantiza cu Gobierno Hulandes ta mantene influencia pa determina maneho di nos Pais. Falta di capacidad y autoridad moral pa negocia cu Gobierno Hulandes a conduci na un concepto di ley di consenso di reino cu ta atacha nos autonomia y ta garantisa cu reformanan di austeridad wordo imponi cu consequencia nan negativo pa nos ciudadano.

 

Organo pa reforma y desaroyo (COHO)

 

E concepto di ley di consenso ta uno problematico. Raad van state pa asuntonan di reino ta critico y a desaproba e concepto presenta anterior, pero cu e cambionan menciona nos ta conclui cu no obstante e pensamento nan critico di Raad van State no tin cambio substancial ni fundamental na e concepto nobo. Raad van State a confirma nos obhecionan, cu e concepto di ley ta impugna cu principionan cu ta forma e fundeshi di nos structura estatal di reino cual ta autonomia, partner igual y un grado di responsabilidad amplio di e Paisnan autonomo den reino pa nan asuntonan interno. Locual ta mas preocupante ta e competencia di alcanse amplio relaciona cu asuntonan interno di Pais cu a wordo otorga na un un entidad Hulandes y e minister Hulandes encarga cu asuntonan di reino Hulandes pa asina determina nos desaroyo sociaal-economico como Pais. E minister Hulandes tin e autoridad final den constelacion y structura presenta den e concepto di ley di consenso. E minister Hulandes a mantene su autoridad pa instrui COHO inicia, promove of impone reforma y medida nan acorda na momento cu a accepta e landenpakket, cual no lo wordo aproba democraticamente pa nos respresentantenan den parlamento. Nos ta conclui cu nada no a wordo adapta na e esencia di e concepto di ley cu ta mina nos autonomia. Al contrario nos a entrega autoridad na un entidad Hulandes y e minister Hulandes encarga cu asunto di reino pa asina por determina nos destino y nos desaroyo social-economico. Mirando e desaroyo social-economico di e pais nan BES e ultimo 11, nos no por ta optimista pa cu e concepto di ley di consenso cu a wordo presenta.

 

Medida di austeridad y landenpakket

 

E contenido di e landenpakket acorda entre Gobierno Hulandes y Gobierno di Aruba tin caracter di un acuerdo mutuo conforme articulo 38 inciso 1 di nos statuut. Mi ta enfatisa cu tin diferente elementonan preocupante cu ta forma parti integral di e landenpakket. Medida y reforma cu lo no contribui na eleva e calidad di bida nos ciudadanonan. E intencion ta pa introduci reformanan fundamental na nos mercado laboral cual lo bai permiti mas flexibilidad como componente esencial di nos mercado laboral. E un desaroyo preocupante pa motibo cu nos ciudadanonan lo bai forma parti di un mercado laboral cu no lo brinda e seguridad financiero ni seguridad laboral cu ta necesario den momentonan difcil. Introduccion di medidanan relaciona cu  cuido medico cu lo afecta esnan cu salud mas vulnerabel den nos comunidad. E intencion pa introduci un contribucion propio na centro di emergencia, introduccion di impuesto di solidaridad y recorte den e gastonan di cuido medico di AZV cu consecuencianan negativo pa e calidad cuido medico cu lo wordo suminstra na nos ciudadanonan. E aumento di costo di bida ta notabel den e ultimo añanan. E intencion pa introduci un sistema di impuesto adicional di 12.5% di BTW, lo ta un medida di austeridad cu lo stagna nos economia y frena desaroyo economico cu un consecuencia cu e costo di bida lo aumenta mientras cu poder di compra y entrada di nos ciudadanonan ta wordo reduci. Medidanan cu consecuencia nan negativo pa un desaroyo social-economico di nos Pais.

 

Norma Caribense 

 

E desaroyo social-economico cu e autoridad nan Hulandes ta desea pa e paisnan caribense, ta un desaroyo social-economico conforme e normanan caribense. Aruba ta wordo reconoci como un Pais cu ambicionan y aspiracionnan profundo. Gobierno su tarea ta pa asisti y crea condicionan necesario pa nos ciudadanonan por realisa nan ambicionan y aspiracionan. Nos como pais a gosa den e ultimo añanan di un calidad di bida eleva, provoca pa inversionnan strategico di e Gobierno anterior di asignatura di AVP. Un pensioen general, aumento di salario minimo y un seguro medico general ta algun ehempel realisa pa un vision determina di Partido AVP.  E spirito di e concepto di COHO adhunto cu e landenpakket ta den esencia dirigi pa devalua nos calidad di bida conforme e normanan caribense mediante introducion di varios medida di austeridad. Nos ta reconoce e importancia di un laso fuerte y relacionan extenso den reino Hulandes pa asina hunto por realisa metanan comun pero e ta importante pa nos realisa cu nos no por permiti cu un autoridad Hulandes cu consentimento di nos Gobernantenan demisionario actual, impone un calidad di bida inferior na nos ambicionan. Den e landenpakket nos no por constata  elementonan cu lo percura pa un recuperacion economico. Introduccion di medidanan di austeridad lo percura pa stagna nos economia aun mas cu lo traduci su mes den aumento di pobresa, desempleo y costo di bida.