Home Local Responsabilidad pa financiamento di facilidadnan deportivo

Responsabilidad pa financiamento di facilidadnan deportivo

SHARE

Reparticion di responsabilidad financiero pa cu Deporte

Contrario na e impresion cu hopi ta carga, desde 2012 mantencion di facilidadnan deportivo ta responsabilidad di Gobierno di Aruba hunto cu FFD. Actualmente, gobierno ta subsidiando Fundacion Facilidadnan Deportivo (“FFD”) cu 2.95 miyon florin pa aña pa mantene nos facilidadnan deportivo.

FLPD mientras tanto a compromete su mes pa contribui na nos federacionnan deportivo via Stichting Sportsubsidie Aruba (“SSA”). Pa por bin na remarca pa subsidio, federacionnan deportivo ta haci un peticion serca SSA. E peticion mester ta pa proyecto/propositonan specifico y e federacion mester cumpli cu tur protocol y rekisito di SSA. 

Falta di fondo

Canadian Bank Note (“CBN”) y Canadian Bank Note Aruba (“CBNA”) cu ta opera Lotto, e Loteria di Aruba, tabata obheto di varios informe incorecto di parti di mandatarionan recientemente. Den medionan di comunicacion ta wordo treci cu CBN ta cobra demasiado pa su servicionan y cu no ta sobra fondo pa mantencion di facilidad deportivo. 

Den un relato publica siman pasa diabierna, CBN y CBNA a duna claridad riba con e fondonan genera pa Lotto ta wordo reparti den realidad. 

Mientras cu mantencion di facilidadnan deportivo ta responsabilidad di gobierno y FFD na e momentonan aki, CBN y CBNA tin simpatia pa e dificultadnan cu ta enfrentando riba e tereno aki. E 2.95 miyon cu FFD ta conta cun’e tur aña kizas no ta suficiente y por tin maneranan pa yega na mas fondo pa e proposito aki y CBN y CBNA ta keda dispuesto pa dialoga riba esaki cu cualkier gobierno. 

 

Dialogo

Na varios ocasion CBN y CBNA a trata di presenta solucion pa e problema aki na e gobierno demisionario. Tin posibilidad pa e loteria genera fondo adicional pa deporte en general, pero mester dialoga y colabora pa por realiza esaki. Lastimamente e gobierno demisionario no tawata disponibel pa dialoga riba e topico aki desde 2018, apesar di hopi intento di banda di CBN y CBNA. CBN y CBNA ta mantene cu dialogo y colaboracion ta e mihor manera pa sirbi interes di nos deportistanan y ta spera cu e proximo gobierno ta habri pa esaki.