Home Politics Segun Parlamentario Gerlien Croes di AVP: No por aparta placa pa salario...

Segun Parlamentario Gerlien Croes di AVP: No por aparta placa pa salario pa futuro mientras werksternan ta wordo kita

SHARE

Diabierna mainta Parlamento a trata presupuesto 2021 y miembro di fraccion di AVP, Gerlien Croes, tambe a atende e reunion mescos cu tabata intencion di henter fraccion di AVP.

Sinembargo na momento cu Gerlien Croes a yega Parlamento prome cu e reunion mester a inicia, el a topa c’un grupo di trahadonan  di limpiesa kendenan tabata traha pa SKOA.

“Ta hendenan cu ta bibando den un incertidumbre total pa loke ta nan futuro laboral, mirando cu a wordo menciona pa e minister demisionario di enseñansa, cu nan lo wordo manda cas.

Aki ta bon pa mustra cu contrario na loke ta wordo treci dilanti, no ta cuestion cu fraccion di AVP  no kier a atende e reunion ya cu mi persona y otro miembronan di e fraccion, a traha riba varios pregunta relaciona cu presupuesto 2021, cu tur seriedad pa atende e asunto aki.

Pero cosnan ta cambia y ora cu nos a encontra cu e grupo di trahadonan aki, hendenan grandi cu ta luchando pa nan bienestar personal y familia, cualkier representante di pueblo manera ta obligacion di un parlamentario, ta di para y scucha e hendenan aki desahoga nan preocupacion.

Nos como Parlamentario, a wordo eligi pa representa pueblo y pafo di Parlamento tabatin hendenan di nos pueblo sperando pa wordo scucha, ya cu ora cu nan drenta den e reunion, nan lo no wordo scucha of atendi.

Ta hendenan cu tin varios luna ta mirando nan futuro colga na un hilo,  cu no ta confia riba seriedad di e maneho di un minister di enseñansa cu ta bisa un cos awe y ta haci otro mayano y nos di fraccion di AVP, sin duda a atende cu e hendenan aki.

Pa e motibo aki tambe fraccion di AVP ta condena e posicion tuma pa Presidente di Parlamento, Edgar Vrolijk, kende a dicidi di habri reunion y cera esaki bek pa asina laga tur miembro di Parlamento cu a drenta lat pa e reunion, sin cu nan por a hiba palabra durante tratamento di e presupuesto.

Mi persona a studia e presupuesto extensamente, a dirigi un serie di pregunta na gobierno cu no ta tur a wordo contesta pero na momento cu mira cu den tribuna tin un grupo di trahadonan di scolnan cu ta confrontando tempo di incertidumbre, e situacion ta cambia.

E ta cambia ainda mas ora cu den presupuesto 2021, gobierno a aparta un suma di 8 miyon florin, pa asina cubri un total di 142 cupo di trabou cu lo bira disponibel dentro di algun luna, pues aki gobierno ta aparta un suma considerabel, pa emplea su hendenan den futuro, mientras cu riba tribuna tin un grupo di werkster sinta sin cu tin claridad riba nan futuro laboral.

E ta un situacion fastioso y ora cu  fraccion di AVP ripara cu Presidente di Parlamento no a mira ningun balor den presencia di e grupo aki, ta mas cu claro cu e no ta actua democraticamente, cu e Presidente cu tambe ta un representante di pueblo, ta mustra cu e no kier sirbi interes di mesun pueblo aki.

Ta dificil pa trece dilanto durante tratamento di e presupuesto, cu gobierno ta pone 8 miyon un banda pa 142 cupo di trabou cu ta bin disponibel y e werksternan aki ripara cu pa otronan tin placa pero na nan mes, pa nan sigui haci e trabou importante aki di tin tur scol limpi pa comienso di aña escolar y resto di schooljaar, lo no tin placa disponibel,” Parlamentario Gerlien Croes a declara.